കൊച്ചി: റിലയൻസ് ജിയോയുടെ 5ജി സേവനങ്ങൾ ചൊവ്വാഴ്ച മുതൽ കേരളത്തിലും. കൊച്ചി കോർപറേഷൻ പരിധിയിലാണ് 5ജി ലഭ്യമാകുക. മുഖ്യമന്ത്രി പിണറായി വിജയൻ സേവനം ഉദ്ഘാടനം ചെയ്യും.
ആദ്യഘട്ടത്തിൽ തെരഞ്ഞെടുത്ത മേഖലകളിലാണ് 5ജി ലഭ്യമാക്കുന്നത്. ചൊവ്വാഴ്ച വൈകിട്ട് 5.30ന് പനമ്പിള്ളി നഗർ ഹോട്ടൽ അവന്യൂ സെൻററിൽ നടക്കുന്ന പരിപാടിയിൽ മുഖ്യമന്ത്രി തിരുവനന്തപുരത്ത് നിന്ന് ഓൺലൈനായി ഉദ്ഘാടനം നിർവഹിക്കും.
ഒക്ടോബർ മുതലാണ് റിലയൻസ് ജിയോ 5ജി സേവനങ്ങൾ രാജ്യത്ത് ലഭ്യമാക്കി തുടങ്ങിയത്. പരീക്ഷണാടിസ്ഥാനത്തിൽ മുംബൈ, ഡൽഹി, കോൽക്കത്ത നഗരങ്ങളിലാണ് സേവനങ്ങൾ ലഭ്യമാക്കിയത്. ഇതിനുശേഷം മറ്റിടങ്ങളിലേക്കും വ്യാപിപ്പിക്കുകയായിരുന്നു.
