വയനാട്: റേഡിയോ കോളര് ഘടിപ്പിച്ച കാട്ടാനയുടെ ആക്രമണത്തില് യുവാവ് കൊല്ലപ്പെട്ട സംഭവത്തില് മാനന്തവാടിയില് വന് പ്രതിഷേധം.കാട്ടാനയുടെ ആക്രമണത്തില് കൊല്ലപ്പെട്ട അജിയുടെ മൃതദേഹവുമായി നാട്ടുകാര് പ്രതിഷേധം തുടരുകയാണ്.മാനന്തവാടിയില് പ്രതിഷേധക്കാര് റോഡ് ഉപരോധിക്കുകയും വാഹനങ്ങള് തടയുകയും ചെയ്തു.ഇന്ന് രാവിലെ ഏഴരയോടെയാണ് കാട്ടാനയുടെ ആക്രമണത്തില് 42കാരനായ പനച്ചിയില് അജി കൊല്ലപ്പെട്ടത്.
മതില് പൊളിച്ചെത്തിയ ആന അജിയെ ആക്രമിക്കുകയായിരുന്നു.രാവിലെയാണ് മാനന്തവാടി ചാലിഗദ്ധയിലാണു കാട്ടാന എത്തിയത്. കര്ണാടക റേഡിയോ കോളര് ഘടിപ്പിച്ചു കാടുകയറ്റിയ ആനയാണു ജനവാസമേഖലയിലേക്കെത്തിയത്.മെഡിക്കല് കോളജിലേക്ക് എത്തിയ വയനാട് എസ്പി ടി നാരായണന്റെ വാഹനം തടഞ്ഞ നാട്ടുകാര് ഗോ ബാക്ക് വിളികള് ഉയര്ത്തി.സ്ഥലത്തെത്തിയ ജില്ലാ കലക്ടര്ക്കെതിരെയും നാട്ടുകാരുടെ പ്രതിഷേധം തുടര്ന്നു.പ്രതിഷേധത്തെ തുടര്ന്ന് എസ്പി വാഹനത്തില് നിന്ന് ഇറങ്ങി നടന്നുപോകാന് നാട്ടുകാര് പറഞ്ഞു.
പ്രതിഷേധം കനത്തതോടെ മാനന്തവാടി മെഡിക്കല് കോളജ് ആശുപത്രിയിലേക്ക് വാഹനത്തില്നിന്നിറങ്ങി എസ്പി നടന്നുപോകുകയാണ് ചെയ്തത്.കാട്ടാന ജനവാസമേഖലയില് തന്നെ തുടരുന്നതിനാല് മാനന്തവാടി നഗരസഭയിലെ 4 ഡിവിഷനുകളില് നിരോധനാജ്ഞ പ്രഖ്യാപിച്ചു. കുറുവ, കുറുക്കന്മൂല, പയ്യമ്ബള്ളി, കാടന്കൊല്ലി ഡിവിഷനുകളിലാണു ജില്ലാ ഭരണകൂടം 144 പ്രഖ്യാപിച്ചത്.നേരത്തെ തണ്ണീര്ക്കൊമ്ബന് നഗരത്തിലിറങ്ങിയപ്പോഴും മാനന്തവാടിയില് നിരോധനാജ്ഞ പ്രഖ്യാപിച്ചിരുന്നു.