ഒരു കാലഘട്ടത്തില്‍ മലയാള സിനിമയെ തങ്ങളുടെ കാഴ്ച്ചപ്പാടിലൂടെ മുന്നോട്ടു കൊണ്ടുപോയവര്‍. മലയാളി പ്രേക്ഷകരുടെ പ്രിയപ്പെട്ട സിനിമകളൊരുക്കിയവര്‍. നടന്മാരെ താരങ്ങളും സൂപ്പര്‍ താരങ്ങളുമാക്കിയവര്‍. എന്നാല്‍, ഇന്നവരില്‍ പലരും തങ്ങളുടെ സുവര്‍ണകാലത്തിന്റെ നിഴല്‍ മാത്രമാണ്. പ്രതിഭകള്‍ എന്ന് പ്രേക്ഷകര്‍ വിളിച്ചിരുന്ന ആ സംവിധായകര്‍ക്ക് എന്തു സംഭവിച്ചു?
തങ്ങളുടെ തലമുറയ്‌ക്കൊപ്പം വളര്‍ന്നു വന്ന ഇന്നത്തെ മെഗാതാരങ്ങളും പുതുതലമുറയിലെ സൂപ്പര്‍ താരങ്ങളും തങ്ങളെ അപമാനിക്കുകയുംഅവഗണിക്കുകയും ചെയ്യുകയാണെന്നാണ് മുന്‍കാല സംവിധായകരുടെ പരാതി. എന്നാല്‍ ആ പരാതിയില്‍ എത്രത്തോളം കഴമ്പുണ്ട്? സ്വയം നവീകരിക്കാനാവാതെ ഔട്ട് ഡേറ്റഡ് ആയിപ്പോയത് ആരുടെ കുറ്റമാണ്? ഇങ്ങനെയും ചില ചോദ്യങ്ങള്‍ ഉയരുന്നുണ്ട്. അതെത്രമാത്രം അടിസ്ഥാനമുള്ളതാണ്?
