ഇടുക്കി/തേനി : ദീപപ്രഭയിൽ മുങ്ങി ആഹ്ലാദത്തിന്റെ നിറവിൽ ദീപാവലിയെ വരവേൽക്കുകയാണ് കേരള-തമിഴ്നാട് അതിർത്തി ഗ്രാമങ്ങൾ. അതിർത്തി പ്രദേശങ്ങളിലുടനീളം ഉത്സവപ്രതീതിയും ആവേശവുമാണ് ദൃശ്യമാകുന്നത്.
ഒരുവശത്ത് വർണാഭമായ പടക്ക വിപണികളും മധുരപലഹാരച്ചന്തകളും സജീവമാകുമ്പോൾ മറുവശത്ത് ദീപാവലി ആഘോഷിക്കാൻ ജന്മനാട്ടിലേക്ക് മടങ്ങുന്ന തമിഴ് ജനതയുടെ തിരക്കാണ് അതിർത്തികളിൽ കാണാൻ കഴിയുന്നത്.
ഇടുക്കി ജില്ലയോട് ചേർന്നുകിടക്കുന്ന തമിഴ്നാട്ടിലെ തേനി ജില്ലയിലെ അതിർത്തി പ്രദേശങ്ങളിലാണ് ദീപാവലി ആഘോഷങ്ങളുടെ ആവേശം ഏറ്റവും കൂടുതൽ പ്രകടമാകുന്നത്. കുമളി, ബോഡിനായ്ക്കന്നൂർ തുടങ്ങിയ മേഖലകളിലെ പടക്കച്ചന്തകളിൽ വലിയ തിരക്കാണ് അനുഭവപ്പെടുന്നത്.
കുറഞ്ഞ വിലയിൽ ഗുണനിലവാരമുള്ള പടക്കങ്ങൾ ലഭിക്കുമെന്നതാണ് കേരളത്തിൽ നിന്നുള്ള ആളുകളെ ഇങ്ങോട്ടേക്ക് ആകർഷിക്കുന്നത്. കുടുംബത്തോടും സുഹൃത്തുക്കളോടുമൊപ്പം പടക്കങ്ങൾ വാങ്ങാനായി നൂറുകണക്കിന് മലയാളികളാണ് അതിർത്തി കടന്ന് തേനിയിലെ വിപണികളിലേക്ക് എത്തുന്നത്.
പരമ്പരാഗത ചടങ്ങുകളോടെയാണ് തമിഴ് ജനത ദീപാവലി ആഘോഷങ്ങൾ ആരംഭിക്കുന്നത്. പുലർച്ചെയുള്ള എണ്ണക്കുളി അഥവാ ഗംഗാസ്നാനം ആണ് പ്രധാനം. അതിനുശേഷം പുത്തൻ വസ്ത്രങ്ങൾ ധരിച്ച് ക്ഷേത്രദർശനം നടത്തുകയും സർവ്വ ഐശ്വര്യങ്ങൾക്കായി പ്രാർത്ഥിക്കുകയും ചെയ്യുന്നു.
തുടർന്ന് സുഹൃത്തുക്കൾക്കും ബന്ധുക്കൾക്കും മധുരപലഹാരങ്ങൾ കൈമാറിയും ആശംസകൾ നേർന്നുമാണ് അവർ സന്തോഷം പങ്കുവെക്കുന്നത്. വീടുകളുടെ മുറ്റത്ത് വർണപ്പൊടികളാൽ മനോഹരമായ കോലങ്ങൾ വരയ്ക്കുന്നതും വിളക്കുകൾ തെളിയിക്കുന്നതും അതിർത്തി ഗ്രാമങ്ങളിലെ പ്രധാന കാഴ്ചയാണ്.
അതേസമയം കേരളത്തിലെ വിവിധ ഭാഗങ്ങളിൽ ജോലി ചെയ്യുന്ന ആയിരക്കണക്കിന് തമിഴ് തൊഴിലാളികളാണ് ആഘോഷങ്ങൾക്കായി സ്വന്തം നാടുകളിലേക്ക് മടങ്ങുന്നത്. ഇതോടെ കുമളി അടക്കമുള്ള ചെക്ക്‌ പോസ്റ്റുകളിലും ബസ് സ്റ്റാൻഡുകളിലും യാത്രാ വാഹനങ്ങളിലും കനത്ത തിരക്കാണ് അനുഭവപ്പെടുന്നത്.
അതിർത്തി കടന്നുള്ള ബസ് സർവീസുകളിലെല്ലാം വൻ തിരക്കാണ് രേഖപ്പെടുത്തുന്നത്. ജനങ്ങളുടെ യാത്രാസൗകര്യം പരിഗണിച്ച് കൂടുതൽ സുരക്ഷാ ക്രമീകരണങ്ങളും ഗതാഗത നിയന്ത്രണങ്ങളും അതിർത്തിയിൽ അധികൃതർ ഏർപ്പെടുത്തിയിട്ടുണ്ട്.
പടക്ക വിപണിയും യാത്രാ തിരക്കും തമിഴ് സംസ്കാരത്തിന്റെ മാറ്റ് കൂട്ടുന്ന പരമ്പരാഗത ആചാരങ്ങളും ചേർന്ന് കേരളവും തമിഴ്നാടും തമ്മിലുള്ള ഊഷ്മളമായ സാംസ്കാരിക-അതിർത്തി ബന്ധങ്ങളുടെ വലിയൊരു ആഘോഷക്കാഴ്ചയായി മാറിയിരിക്കുകയാണ് ദീപാവലി ഉത്സവം.
