യു എസ് പ്രസിഡന്റ് ഡൊണാൾഡ് ട്രംപിന്റെ സ്വപ്ന പദ്ധതിയായ ‘ബിഗ് ബ്യൂട്ടിഫുൾ’ ബജറ്റ് ബിൽ ജനപ്രതിനിധി യുഎസ് സഭയിൽ പാസായതോടെ അമേരിക്കൻ സാമ്പത്തിക നയത്തിൽ ഒരു പുതിയ അധ്യായം കുറിക്കപ്പെട്ടിരിക്കുകയാണ്.റിപ്പബ്ലിക്കൻ പാർട്ടിക്ക് ഭൂരിപക്ഷമുള്ള സഭയിൽ 218-214 വോട്ടിനാണ് ബിൽ പാസാക്കിയത്.
സ്വാതന്ത്ര്യദിനമായ ജൂലൈ 4-ന് പ്രസിഡന്റ് ട്രംപ് ഈ ബില്ലിൽ ഒപ്പുവെക്കും.ഈ ബിൽ പാസായത് അമേരിക്കയുടെ സമ്പദ്വ്യവസ്ഥയിലും സാമൂഹിക ക്ഷേമത്തിലും ദൂരവ്യാപകമായ പ്രത്യാഘാതങ്ങൾ ഉണ്ടാക്കുമെന്നാണ് വിദഗ്ദ്ധർ വിലയിരുത്തുന്നത്. പ്രസിഡന്റ് തിരഞ്ഞെടുപ്പ് പ്രചാരണ വേളയിലുടനീളം ട്രംപ് എടുത്തു വീശിയ ഒരു പ്രധാന പരിഷ്കാരമായിരുന്നു ഈ ബിൽ.
‘അമേരിക്ക ഫസ്റ്റ്’ നയം മുറുകെപ്പിടിക്കുന്ന വ്യക്തിഗത, ബിസിനസ് നികുതി ഇളവുകളും ചിലവ് ചുരുക്കലുകളും ഈ ബില്ലിന്റെ മുഖമുദ്രയാണ്.ട്രംപിന്റെ ‘ബിഗ് ബ്യൂട്ടിഫുൾ’ ബിൽ പ്രധാനമായും സമ്പന്നർക്കും വലിയ കോർപ്പറേഷനുകൾക്കും വേണ്ടിയുള്ളതാണെന്ന് വിമർശകർ ചൂണ്ടിക്കാട്ടുന്നു.
നികുതി ഇളവുകളുടെ കണക്കുകൾ ഇത് ശരിവെക്കുന്നു. അടുത്ത വർഷം താഴ്ന്ന വരുമാനക്കാർക്ക് തുച്ഛമായ 150 ഡോളറിന്റെയും, ഇടത്തരക്കാർക്ക് 1750 ഡോളറിന്റെയും ഇളവ് ലഭിക്കുമ്പോൾ, സമ്പന്നർക്ക് 10,950 ഡോളറിന്റെ വലിയ നികുതി ഇളവുകളാണ് ലഭിക്കുക. ഈ അസമത്വം ബിൽ ആർക്കുവേണ്ടിയാണ് രൂപകൽപ്പന ചെയ്തതെന്ന ചോദ്യം ഉയർത്തുന്നു.
ചെലവ് വെട്ടിക്കുറയ്ക്കലുകളും സാധാരണക്കാരെയും അവശത അനുഭവിക്കുന്നവരെയും ആണ് കൂടുതലായി ബാധിക്കുന്നത്. പോഷകാഹാരത്തിന്റെയും ആരോഗ്യ പരിപാലനത്തിന്റെയും ചെലവുകൾ വെട്ടിക്കുറയ്ക്കുന്നത് 12 ലക്ഷം മുതൽ 42 ലക്ഷം വരെ വരുന്ന ആളുകളെ ബാധിക്കുമെന്നാണ് കണക്കാക്കുന്നത്. ഇലോൺ മസ്ക്ക് അടക്കമുള്ള വ്യവസായ പ്രമുഖർ ഈ ബില്ലിനെതിരെ രംഗത്തുവന്നത് അതിന്റെ സ്വഭാവം എത്രത്തോളം സാധാരണക്കാർക്ക് എതിരാണെന്ന് വ്യക്തമാക്കുന്നു.
ഈ ബില്ലിൽ ഉൾപ്പെടുത്തിയിരിക്കുന്ന ചില പ്രധാന വ്യവസ്ഥകളും അവയുടെ സാധ്യതയുള്ള പ്രത്യാഘാതങ്ങളും ഇവയാണ്:
17800 കോടി ഡോളറാണ് കുടിയേറ്റ നിയന്ത്രണത്തിനായുള്ള ചെലവായി ബില്ലിൽ വിഭാവനം ചെയ്തിരിക്കുന്നത്. ഇത് യുഎസ്-മെക്സിക്കോ അതിർത്തിയിൽ കൂടുതൽ സുരക്ഷാ സംവിധാനങ്ങൾ സ്ഥാപിക്കുന്നതിനും കുടിയേറ്റ നയങ്ങൾ കർശനമാക്കുന്നതിനും ഉപയോഗിച്ചേക്കാം. എന്നാൽ, ഇത് മാനുഷികപരമായ വിഷയങ്ങളിൽ വലിയ ആശങ്കകൾ ഉയർത്തുന്നുണ്ട്.
പരിസ്ഥിതി സൗഹൃദപരമായ ഊർജ്ജ സ്രോതസ്സുകൾക്ക് നൽകിയിരുന്ന സബ്സിഡികൾ കുറയ്ക്കാൻ ബിൽ ലക്ഷ്യമിടുന്നു. ഇതിനുപകരം ഫോസിൽ ഇന്ധനങ്ങളെ പ്രോത്സാഹിപ്പിക്കാനും ഇലക്ട്രിക് വാഹനം, ക്ലീൻ എനർജി എന്നിവയുടെ സബ്സിഡി നിർത്തലാക്കാനും ബില്ലിൽ നീക്കമുണ്ട്.
ഇത് കാലാവസ്ഥാ വ്യതിയാനത്തിനെതിരായ ആഗോള പോരാട്ടത്തെ പിന്നോട്ടടിക്കുമെന്നും പരിസ്ഥിതി പ്രവർത്തകർക്കിടയിൽ വലിയ പ്രതിഷേധത്തിന് ഇടയാക്കുമെന്നും വിലയിരുത്തപ്പെടുന്നു.അമേരിക്കയിൽ വളരെ ജനപ്രിയമായ ആരോഗ്യ, പോഷകാഹാര പദ്ധതികൾക്കുള്ള വിഹിതം വെട്ടിക്കുറയ്ക്കാൻ ബില്ലിൽ വിഭാവനം ചെയ്യുന്നു.
മെഡിക്എയ്ഡ് പോലുള്ള പദ്ധതികൾക്ക് ലഭിച്ചിരുന്ന ഫണ്ടിൽ ലക്ഷം കോടി ഡോളറിന്റെ വെട്ടിക്കുറവുണ്ടാകും. പ്രായമായവരും ഭിന്നശേഷിക്കാരും താഴ്ന്ന വരുമാനക്കാരും ആശ്രയിക്കുന്ന ഈ പദ്ധതികൾക്ക് വരുന്ന വെട്ടിക്കുറവ് ദശലക്ഷക്കണക്കിന് അമേരിക്കക്കാരെ നേരിട്ട് ബാധിക്കും.
ഏകദേശം 1.2 കോടി അമേരിക്കക്കാരുടെ ആരോഗ്യ ഇൻഷുറൻസ് പരിരക്ഷ ഇല്ലാതാകാൻ ഇത് വഴിവെക്കുമെന്നും വിദഗ്ദ്ധർ ചൂണ്ടിക്കാട്ടുന്നു. ഈ വിഷയം ഡെമോക്രാറ്റുകൾ വലിയ രാഷ്ട്രീയ വിഷയമായി ഉയർത്തിയിരുന്നു.2017-ൽ ട്രംപ് തുടങ്ങിയ പല നികുതി ഇളവുകളുടെയും കാലാവധി ഈ വർഷം അവസാനിക്കുകയാണ് , അത് നീട്ടി കൊടുക്കുന്നതിനുള്ള നടപടി കൂടിയാണ് ഈ ബിൽ.
ഇതിനെതിരെ കടുത്ത എതിർപ്പാണ് ഉയരുന്നത്.ഈ ബിൽ പാസാകുന്നത് സാധാരണ അമേരിക്കക്കാരെയും ചെറുകിട ബിസിനസ്സുകളെയും എന്തിന് സ്റ്റേറ്റുകളെയും വരെ ദോഷകരമായി ബാധിക്കുമെന്നും വൻ സാമ്പത്തിക മാന്ദ്യത്തിലേക്ക് നയിക്കുമെന്നും പരക്കെ വിമർശനമുയർന്നിട്ടുണ്ട്.
സമ്പദ്വ്യവസ്ഥയുടെ വളർച്ചയെക്കുറിച്ചുള്ള ട്രംപിന്റെ കാഴ്ചപ്പാടുകൾ ദീർഘകാലാടിസ്ഥാനത്തിൽ രാജ്യത്തിന് ഗുണകരമാകുമോ എന്നത് കണ്ടറിയണം.മുൻ പ്രസിഡന്റ് ജോ ബൈഡൻ ഈ ബില്ലിനെ “ക്രൂരമായ ബജറ്റ് ബിൽ” എന്ന് വിശേഷിപ്പിച്ചു. .ചൊവ്വാഴ്ച സെനറ്റിൽ ബിൽ പാസായത് ഏറെ നാടകീയമായിരുന്നു.
100 അംഗങ്ങളുള്ള സെനറ്റിൽ 50 പേർ അനുകൂലിച്ചും 50 പേർ എതിർത്തും വോട്ടുചെയ്തു. സെനറ്റ് അധ്യക്ഷനായ വൈസ് പ്രസിഡന്റ് ജെ.ഡി. വാൻസ് അനുകൂലിച്ച് വോട്ടുചെയ്തതോടെയാണ് ബിൽ സെനറ്റ് കടന്നത്. ഇത് ബില്ലിനെതിരെ ശക്തമായ വിയോജിപ്പുണ്ടായിരുന്നു എന്നതിന്റെ തെളിവാണ്.
ട്രംപിന്റെ ഭരണപരമായ കഴിവുകളുടെയും സമ്മർദ്ദ തന്ത്രങ്ങളുടെയും ഒരു വിജയമായാണ് പലരും ഇതിനെ കാണുന്നത്. ജൂലൈ 4-ന് മുമ്പ് ബിൽ പാസാക്കണമെന്ന ട്രംപിന്റെ സമയപരിധി കോൺഗ്രസിൽ വലിയ സമ്മർദ്ദം ചെലുത്തിയിരുന്നു.’അമേരിക്ക ഫസ്റ്റ്’ എന്ന മുദ്രാവാക്യം ഉയർത്തിപ്പിടിക്കുന്ന ട്രംപിന്റെ സാമ്പത്തിക തത്വചിന്ത ഈ ബില്ലിൽ വ്യക്തമായി പ്രതിഫലിക്കുന്നു.
രാജ്യത്തിന്റെ സാമ്പത്തിക വളർച്ചയ്ക്ക് ബിസിനസ്സുകളെയും കോർപ്പറേഷനുകളെയും പ്രോത്സാഹിപ്പിക്കുക, നികുതി കുറയ്ക്കുക, സർക്കാർ ചെലവ് വെട്ടിക്കുറയ്ക്കുക എന്നിവയാണ് അദ്ദേഹത്തിന്റെ പ്രധാന ലക്ഷ്യങ്ങൾ. എന്നാൽ, ഈ ലക്ഷ്യങ്ങൾ കൈവരിക്കുമ്പോൾ സാധാരണക്കാരുടെയും പിന്നോക്കം നിൽക്കുന്നവരുടെയും ക്ഷേമം അവഗണിക്കപ്പെടുന്നു എന്ന വിമർശനം ശക്തമാണ്.
ദീർഘകാല സാമ്പത്തിക വളർച്ചയെ ഇത് എങ്ങനെ ബാധിക്കുമെന്ന കാര്യത്തിൽ സാമ്പത്തിക വിദഗ്ദ്ധർക്ക് വ്യത്യസ്ത അഭിപ്രായങ്ങളുണ്ട്. ചിലർ നികുതി ഇളവുകൾ സമ്പദ്വ്യവസ്ഥയെ ഉത്തേജിപ്പിക്കുമെന്നും തൊഴിലവസരങ്ങൾ സൃഷ്ടിക്കുമെന്നും വാദിക്കുമ്പോൾ, മറ്റു ചിലർ ഇത് ദേശീയ കടം വർദ്ധിപ്പിക്കുകയും ഭാവി തലമുറകൾക്ക് ഭാരമാകുകയും ചെയ്യുമെന്ന് മുന്നറിയിപ്പ് നൽകുന്നു.
ഈ ബിൽ നിയമമാകുന്നതോടെ, ദശലക്ഷക്കണക്കിന് അമേരിക്കൻ പൗരന്മാരുടെ ജീവിതത്തിൽ കാര്യമായ മാറ്റങ്ങൾ ഉണ്ടാകും. ആരോഗ്യ ഇൻഷുറൻസ് ഇല്ലാത്തവരുടെ എണ്ണം വർദ്ധിക്കാനും, സാമൂഹ്യ സുരക്ഷാ പദ്ധതികൾ ദുർബലമാകാനും ഇത് വഴിവെച്ചേക്കാം. സാമ്പത്തിക അസമത്വം വർദ്ധിക്കാനുള്ള സാധ്യതയുമുണ്ട്.
അമേരിക്കയുടെ രാഷ്ട്രീയ ഭാവിയിലും ഈ ബിൽ ഒരു പ്രധാന പങ്ക് വഹിക്കും. വരാനിരിക്കുന്ന തിരഞ്ഞെടുപ്പുകളിൽ ഈ ബില്ലിന്റെ പ്രത്യാഘാതങ്ങൾ ഒരു പ്രധാന വിഷയമായി മാറുമെന്നതിൽ സംശയമില്ല. ട്രംപിന്റെ ഈ സാമ്പത്തിക നയം അമേരിക്കൻ ജനത എത്രത്തോളം അംഗീകരിക്കും എന്നതിനെ ആശ്രയിച്ചിരിക്കും അദ്ദേഹത്തിന്റെ രാഷ്ട്രീയ ഭാവി.
