അധ്വാനിക്കുന്നവന്റെ അവകാശങ്ങൾക്കായി പൊരുതി വീണവരുടെയും ലോകത്തെ പടുത്തുയർത്തിയ തൊഴിലാളി വർഗത്തിന്റെയും സ്മരണ പുതുക്കി ഇന്ന് മെയ് ദിനം ആചരിക്കുന്നു. പോരാട്ടവീര്യത്തിന്റെ ചുവന്ന ചരിത്രമാണ് ഈ ദിനത്തിന് പിന്നിലുള്ളത്.പത്തൊമ്പതാം നൂറ്റാണ്ടിൽ അമേരിക്കയിൽ നടന്ന അവകാശ പോരാട്ടങ്ങളാണ് തൊഴിലാളി ദിനത്തിന് തുടക്കമിട്ടത്.
1884-ൽ അമേരിക്കൻ ഫെഡറേഷൻ ഓഫ് ഓർഗനൈസ്ഡ് ട്രേഡ്സ് ആന്റ് ലേബർ യൂണിയനുകൾ ‘എട്ടു മണിക്കൂർ ജോലി’ എന്ന ആവശ്യം ആദ്യമായി മുന്നോട്ടുവെച്ചു. ഈ ആവശ്യമുന്നയിച്ച് 1886-ൽ തൊഴിലാളികൾ ഒന്നടങ്കം സമരത്തിനിറങ്ങി.ചിക്കാഗോയിലെ ഹേ മാർക്കറ്റ് സ്ക്വയറിൽ നടന്ന സമാധാനപരമായ പ്രതിഷേധത്തിലേക്ക് ബോംബ് എറിയപ്പെട്ടതോടെ സമരം അക്രമാസക്തമായി.
തുടർന്നുണ്ടായ സംഘർഷത്തിലും പോലീസ് വെടിവെപ്പിലും നിരവധി തൊഴിലാളികൾ കൊല്ലപ്പെട്ടു.’ഹേ മാർക്കറ്റ് കലാപം’ എന്നറിയപ്പെടുന്ന ഈ സംഭവം ലോകമെമ്പാടുമുള്ള തൊഴിലാളി പ്രസ്ഥാനങ്ങളെ ഉണർത്തുന്നതായിരുന്നു.ഈ ധീരമായ പോരാട്ടത്തെ ആദരിക്കുന്നതിനായി 1889-ൽ നടന്ന അന്താരാഷ്ട്ര സോഷ്യലിസ്റ്റ് കോൺഫറൻസ് മെയ് ഒന്ന് അന്താരാഷ്ട്ര തൊഴിലാളി ദിനമായി പ്രഖ്യാപിച്ചു. 1890-ലാണ് ആദ്യമായി ഔദ്യോഗികമായി മെയ് ദിനം ആചരിച്ചത്.
ഇന്ന് ലോകത്തിലെ ഭൂരിഭാഗം രാജ്യങ്ങളിലും മെയ് ദിനം ദേശീയ അവധിയായി ആചരിക്കുന്നു.ഇടതുപക്ഷ ട്രേഡ് യൂണിയനുകൾ ഉൾപ്പെടെയുള്ള പ്രസ്ഥാനങ്ങൾ ചുവപ്പൻ റാലികളും പൊതുസമ്മേളനങ്ങളും സംഘടിപ്പിക്കുന്നു.തൊഴിലാളി അവകാശങ്ങളെക്കുറിച്ചും തൊഴിലിടങ്ങളിലെ പുതിയ വെല്ലുവിളികളെക്കുറിച്ചും സെമിനാറുകളും പ്രചാരണ പരിപാടികളും നടക്കുന്നു.
രാജ്യത്തിന്റെ വളർച്ചയ്ക്ക് തൊഴിലാളികൾ നൽകുന്ന നിസ്തുലമായ സംഭാവനകളെ ആദരിക്കുന്നതിനുള്ള അവസരം കൂടിയാണിത്.അധ്വാനിക്കുന്ന മനുഷ്യർക്ക് മാന്യമായ ജീവിതവും അർഹമായ അവകാശങ്ങളും ഉറപ്പാക്കാനുള്ള ഓർമ്മപ്പെടുത്തലായി ഓരോ മെയ് ദിനവും ഇന്നും ജ്വലിച്ചു നിൽക്കുന്നു.
