കോഴിക്കോട് : സംസ്ഥാനത്ത് നിപ സ്ഥിരീകരിച്ച് കോഴിക്കോട് മെഡിക്കൽ കോളേജ് ആശുപത്രിയിൽ ചികിത്സയിൽ കഴിയുന്ന രോഗിയുടെ നില അതീവ ഗുരുതരമായി തുടരുന്നു. നിലവിൽ തീവ്രപരിചരണ വിഭാഗത്തിൽ വെന്റിലേറ്റർ സഹായത്തോടെയാണ് ജീവൻ നിലനിർത്തുന്നതെന്ന് ആരോഗ്യ മന്ത്രി കെ മുരളീധരൻ അറിയിച്ചു.
ജൂൺ പത്ത് മുതൽ പ്രതിരോധ മരുന്നുകളും 12 മുതൽ ആന്റിബോഡിയും രോഗിക്ക് നൽകിത്തുടങ്ങിയിരുന്നു. ഇതിന് പുറമെ ഇന്നലെ ബഹ്റൈനിൽ നിന്ന് കോഴിക്കോട് എത്തിച്ച റെംഡെസിവിർ മരുന്നിന്റെ ആദ്യ ഡോസ് ഇന്ന് രാവിലെ രോഗിക്ക് നൽകിയിട്ടുണ്ടെന്നും മന്ത്രി വ്യക്തമാക്കി.
രോഗിയുടെ നില ആശങ്കാജനകമാണെങ്കിലും വൈറസ് വ്യാപനത്തിന്റെ കാര്യത്തിൽ ഭയപ്പെടേണ്ട സാഹചര്യമില്ലെന്ന് ആരോഗ്യവകുപ്പ് അറിയിച്ചു. രോഗിയുമായി നേരിട്ട് സമ്പർക്കത്തിൽ വന്ന 11 പേരുടെ ഉൾപ്പെടെ 30 പരിശോധനാ ഫലങ്ങളാണ് പുറത്തുവന്നത്. ചികിത്സയിലുള്ള വ്യക്തിയുടേതൊഴികെ മറ്റെല്ലാവരുടെയും പരിശോധനാ ഫലം നെഗറ്റീവ് ആണ്.
സമ്പർക്കപ്പട്ടികയിൽ 44 ആരോഗ്യപ്രവർത്തകർ ഉൾപ്പെട്ടിട്ടുണ്ട്. സമ്പർക്കപ്പട്ടികയിൽ ഉൾപ്പെട്ടിട്ടുള്ള എല്ലാ വ്യക്തികൾക്കും ആവശ്യമായ മെഡിക്കൽ സഹായങ്ങളും കൃത്യമായ മാനസിക-ശാരീരിക നിരീക്ഷണങ്ങളും ആരോഗ്യവകുപ്പ് ഉറപ്പാക്കുന്നുണ്ടെന്നും മന്ത്രി കെ മുരളീധരൻ കൂട്ടിച്ചേർത്തു.
