റഷ്യയിലെ ഒരു വ്യോമതാവളത്തിന് നേരെ യുക്രെയ്ൻ ഡ്രോൺ ആക്രമണം നടത്തിയതിന് ശേഷം, യുക്രെയ്നിൽ വലിയ ആക്രമണങ്ങൾ നടക്കുകയാണ്. യുക്രെയ്ൻ്റെ തലസ്ഥാനമായ കീവിൽ ഉൾപ്പെടെ ജൂൺ 9-ന് നടന്ന റഷ്യൻ ആക്രമണങ്ങൾ ലോകത്തെ ഞെട്ടിച്ചിരിക്കുകയാണ്. കഴിഞ്ഞ മൂന്ന് വർഷത്തെ യുദ്ധത്തിൽ റഷ്യ നടത്തിയ ഏറ്റവും വലിയ രാത്രികാല ഡ്രോൺ ബോംബാക്രമണമാണിത്. ഏകദേശം 500 ഡ്രോണുകളാണ് റഷ്യ യുക്രെയ്നിലേക്ക് അയച്ചതെന്ന് യുക്രേനിയൻ വ്യോമസേന തന്നെ പറയുന്നു.
ഇതിനുപുറമെ, ഞായറാഴ്ച മുതൽ തിങ്കളാഴ്ച വരെ റഷ്യ പലതരം മിസൈലുകളും യുക്രെയ്നിൻ്റെ വിവിധ ഭാഗങ്ങളിലേക്ക് തൊടുത്തുവിട്ടു. ഈ ആക്രമണങ്ങളെല്ലാം പ്രധാനമായും നടന്നത് യുക്രെയ്ൻ്റെ മധ്യ, പടിഞ്ഞാറൻ മേഖലകളിലാണ്. ആഴ്ചകളായി യുദ്ധം നടക്കുന്ന നിപ്രോപെട്രോവ്സ്ക് പ്രവിശ്യയിലെ ഒരു പ്രധാനപ്പെട്ട പ്രദേശം റഷ്യ പിടിച്ചെടുത്തതോടെ, കിഴക്കൻ പ്രവിശ്യയായ ഡോണെറ്റ്സ്കിൽ ചെറുത്തുനിൽക്കുന്ന യുക്രെയ്ൻ സൈന്യം ശരിക്കും കുഴപ്പത്തിലായിരിക്കുകയാണ്. യുക്രെയ്ൻ്റെ വലിയൊരു ഭാഗം ഇതിനോടകം റഷ്യ പിടിച്ചെടുത്തു കഴിഞ്ഞു. യുക്രെയ്ൻ സൈനികർക്ക് റഷ്യ മുഴുവൻ രാജ്യവും പിടിച്ചെടുക്കുമോ എന്ന ഭയമുണ്ട്.
അതേസമയം, യുക്രെയ്ൻ റഷ്യയിലെ വ്യോമതാവളത്തിന് നേരെ നടത്തിയ ഡ്രോൺ ആക്രമണങ്ങൾ പോലും യുക്രെയ്നെതിരെ കൂടുതൽ ശക്തമായ ആയുധങ്ങൾ ഉപയോഗിക്കാൻ റഷ്യയ്ക്ക് അവസരം നൽകിയെന്നാണ് ഇപ്പോൾ പുറത്തുവരുന്ന വിവരങ്ങൾ. യുക്രെയ്നും നാറ്റോയും ചേർന്ന് ആസൂത്രണം ചെയ്ത ഈ ഡ്രോൺ ആക്രമണത്തെക്കുറിച്ച് റഷ്യക്ക് മുൻകൂട്ടി വിവരം ലഭിച്ചിരുന്നെന്നാണ് സി.ഐ.എ സംശയിക്കുന്നത്. അതുകൊണ്ട്, റഷ്യ തങ്ങളുടെ പുതിയ യുദ്ധവിമാനങ്ങളെല്ലാം ഈ വ്യോമതാവളങ്ങളിൽ നിന്ന് മാറ്റി. പകരം, ഉപയോഗശൂന്യമായ വിമാനങ്ങളാണ് ആക്രമിക്കപ്പെട്ട വ്യോമതാവളങ്ങളിൽ നിർത്തിയിരുന്നതെന്നും സി.ഐ.എ പറയുന്നു.
ഡ്രോൺ ആക്രമണത്തിൽ ആളപായം ഉണ്ടാകാത്തതും സംശയമുണ്ടാക്കുന്ന കാര്യമാണ്. ഈ വിവരങ്ങൾ പാശ്ചാത്യ മാധ്യമങ്ങൾക്ക് അറിയാമായിരുന്നെങ്കിലും, റഷ്യയോടുള്ള എതിർപ്പ് കാരണം അവർ റഷ്യയെ താഴ്ത്തിക്കെട്ടാനാണ് ഈ സംഭവത്തെയും ഉപയോഗിച്ചത്.
ഇത് ചൂണ്ടിക്കാണിക്കാതിരിക്കാൻ കഴിയില്ല. എന്തായാലും, യുക്രെയ്ൻ നടത്തിയ ഡ്രോൺ ആക്രമണത്തെ റഷ്യയെ എതിർക്കുന്ന ലോകരാജ്യങ്ങൾക്ക് പോലും ന്യായീകരിക്കാൻ പറ്റാത്ത അവസ്ഥയാണ് ഇപ്പോൾ. ഇത് യഥാർത്ഥത്തിൽ ലോകത്തിന് മുന്നിൽ റഷ്യക്ക് ഗുണം ചെയ്തിരിക്കുകയാണ്. ഇനി എത്ര ശക്തമായ മിസൈലുകൾ യുക്രെയ്നിലേക്ക് റഷ്യ അയച്ചാലും അത് ന്യായീകരിക്കപ്പെടുമെന്ന് ഉറപ്പാണ്.
ഇപ്പോൾ നടന്നുകൊണ്ടിരിക്കുന്നതും അതുതന്നെയാണ്. ലോകത്തിൽ ഇന്നും ഏറ്റവും കൂടുതൽ ആണവായുധ ശേഖരമുള്ള രാജ്യമാണ് റഷ്യ. അതുകൊണ്ട്, റഷ്യക്ക് എതിരെ വെറുതെ പ്രസ്താവനകൾ ഇറക്കുക എന്നതിനപ്പുറം റഷ്യയെ ആക്രമിക്കാൻ നാറ്റോ രാജ്യങ്ങൾക്ക് ചിന്തിക്കാൻ പോലും കഴിയില്ല. യഥാർത്ഥത്തിൽ, നാറ്റോ രാജ്യങ്ങളെ ആക്രമിക്കുന്നതിന് മുൻപുള്ള ഒരു പരീക്ഷണമാണ് റഷ്യ ഇപ്പോൾ യുക്രെയ്നിൽ നടത്തിക്കൊണ്ടിരിക്കുന്നത്. യുദ്ധം മൂന്ന് വർഷം പിന്നിട്ടിട്ടും റഷ്യ ഇതുവരെ യുദ്ധം പ്രഖ്യാപിക്കാത്തതിൻ്റെ കാരണവും ഇത് തന്നെയാണ്. കാരണം, റഷ്യയുടെ യഥാർത്ഥ ശത്രു നാറ്റോയാണ്.
റഷ്യക്ക് ഒറ്റ ബോംബിൽ അവസാനിപ്പിക്കാൻ കഴിയുന്ന യുദ്ധം നീട്ടിക്കൊണ്ടുപോകുന്നതിന് പിന്നിൽ, നാറ്റോ രാജ്യങ്ങളുടെ ആയുധശേഷി എത്രത്തോളമാണെന്ന് പരീക്ഷിക്കുക എന്ന തന്ത്രം കൂടിയുണ്ട്.റഷ്യക്ക് നേരെ നേരിട്ട് യുദ്ധം ചെയ്യുന്നത് യുക്രെയ്നാണെങ്കിലും, അവർ ഉപയോഗിക്കുന്നത് കൂടുതലും നാറ്റോ രാജ്യങ്ങൾ നൽകിയ ആയുധങ്ങളും സാങ്കേതികവിദ്യകളുമാണ്. അതുകൊണ്ട് തന്നെ, ഈ ആയുധങ്ങളുടെയെല്ലാം ശക്തി എത്രത്തോളമാണെന്ന് റഷ്യക്ക് ഇപ്പോൾ മനസ്സിലായി കഴിഞ്ഞു.
റഷ്യ ഇനി എന്താണ് ചെയ്യാൻ പോകുന്നത് എന്ന് വ്‌ളാഡിമിർ പുടിനല്ലാതെ ലോകത്ത് മറ്റാർക്കും അറിയാൻ കഴിയില്ല. ജർമ്മനി ഇപ്പോൾ തന്നെ ഭൂമിക്കടിയിൽ ബങ്കറുകൾ നിർമ്മിച്ച് തുടങ്ങിയിട്ടുണ്ട്. ബ്രിട്ടനും പ്രതിരോധ സംവിധാനങ്ങൾക്കാണ് പ്രാധാന്യം നൽകുന്നത്. അതുപോലെ തന്നെ, മറ്റ് യൂറോപ്യൻ രാജ്യങ്ങളും റഷ്യൻ ആക്രമണത്തെ എങ്ങനെ നേരിടാമെന്ന് ആശങ്കയിലാണ്. അമേരിക്കയുടെ അലാസ്ക റഷ്യയുടെ തൊട്ടടുത്ത് കിടക്കുന്ന പ്രദേശമായതിനാൽ, അമേരിക്കയെ സംബന്ധിച്ചും അത് ഒരു സുരക്ഷാ ഭീഷണി തന്നെയാണ്.
യുക്രെയ്ൻ പ്രസിഡൻ്റ് വൊളോഡിമിർ സെലെൻസ്കി ഏത് നിമിഷവും കൊല്ലപ്പെടാമെന്നതാണ് ഇപ്പോഴത്തെ അവസ്ഥ.
നാറ്റോ നൽകിയ സുരക്ഷാ കവചത്തിൽ ഇപ്പോഴും ഭൂമിക്കടിയിലെ അറകളിൽ കഴിയുന്ന സെലെൻസ്കിയുടെ ജീവന് ഒരുറപ്പുമില്ലെന്ന് അമേരിക്കയ്ക്ക് നന്നായി അറിയാം. വർഷങ്ങൾക്ക് മുൻപ്, ഉത്തര കൊറിയ ആണവ മിസൈൽ അമേരിക്കയ്ക്ക് നേരെ തിരിച്ചു വച്ചപ്പോൾ, പറന്നുവന്ന് കിം ജോങ് ഉന്നുമായി സമാധാന ചർച്ച നടത്തിയ അതേ ട്രംപ് തന്നെയാണ് ഇപ്പോൾ വീണ്ടും അമേരിക്കയിൽ അധികാരത്തിലിരിക്കുന്നത്. അതേസമയം, ഒരു ഭാഗത്ത് യുക്രെയ്നിലെ സൈനിക നടപടികൾക്ക് വേഗത കൂട്ടിയ റഷ്യ, മറുഭാഗത്ത് നാറ്റോ വിരുദ്ധ ചേരിയെ ശക്തമാക്കാനുള്ള നീക്കവും തുടങ്ങിയിട്ടുണ്ട്. ഇറാനുമായി ശക്തമായ സഹകരണത്തിനാണ് റഷ്യ ഇപ്പോൾ തുടക്കം കുറിച്ചിരിക്കുന്നത്. ഉത്തര കൊറിയയിൽ നിന്നും സ്ഥിരം ട്രെയിൻ സർവ്വീസ് തുടങ്ങാനും പുടിൻ നിർദേശം നൽകിക്കഴിഞ്ഞു.
ഇത് രണ്ടും മേഖലയിലെ സൈനിക നീക്കങ്ങൾക്ക് വേഗത നൽകും. ഇതിനിടെ, ഇറാന്റെ പ്രഖ്യാപിത ശത്രുവായ ഇസ്രായേലും ഇപ്പോൾ റഷ്യയുടെ ശത്രുപട്ടികയിൽ ഇടംപിടിച്ചിട്ടുണ്ട്. ഇസ്രായേൽ ചെയ്ത ഒരു തെറ്റിന് വലിയ വില നൽകേണ്ട അവസ്ഥയിലാണ് ആ രാജ്യമിപ്പോൾ. അമേരിക്കൻ നിർമ്മിത പാട്രിയറ്റ് വ്യോമപ്രതിരോധ സംവിധാനങ്ങൾ, ഇസ്രയേൽ രഹസ്യമായി യുക്രെയ്നിന് കൈമാറിയതാണ് റഷ്യയെ ചൊടിപ്പിച്ചത്. യുക്രെയ്നിലെ ഇസ്രയേൽ അംബാസഡർ മിഖായേൽ ബ്രോഡ്സ്കിയാണ് റഷ്യയെ പ്രകോപിപ്പിക്കുന്ന ഈ വെളിപ്പെടുത്തൽ നടത്തിയത്. ഇതോടെ, യുക്രെയ്ന് മാനുഷിക സഹായം മാത്രമാണ് നൽകുന്നതെന്ന ഇസ്രായേലിൻ്റെ വാദം പൊളിഞ്ഞു.
ഇസ്രായേൽ യുക്രെയ്നുമായും റഷ്യയുമായും നല്ല ബന്ധം നിലനിർത്താൻ ശ്രമിക്കുന്നുണ്ടെന്ന് അവകാശപ്പെട്ടിരുന്നു. എന്നാൽ, ഈ അവകാശവാദങ്ങളെല്ലാം ഇസ്രയേൽ അംബാസഡർ തന്നെ ഇല്ലാതാക്കി. ജനുവരിയിൽ ആക്സിയോസ് റിപ്പോർട്ട് ചെയ്തതനുസരിച്ച്, അമേരിക്ക ഇസ്രയേലിൽ നിന്ന് ഏകദേശം 90 പാട്രിയറ്റ് മിസൈലുകൾ യുക്രെയ്നിലേക്ക് എത്തിച്ചിട്ടുണ്ട്. ഇസ്രയേലിൽ മുമ്പ് സ്ഥാപിച്ചിരുന്ന ഒരു പൂർണ്ണ പാട്രിയറ്റ് സിസ്റ്റം യുക്രെയ്ന് ലഭിക്കുമെന്ന് ന്യൂയോർക്ക് ടൈംസും റിപ്പോർട്ട് ചെയ്തിട്ടുണ്ട്.
പാട്രിയറ്റ് മിസൈലുകൾ യുക്രെയ്നിലേക്ക് മാറ്റാനുള്ള ഇസ്രായേലിൻ്റെ ഏതൊരു തീരുമാനവും വലിയ പ്രത്യാഘാതങ്ങൾ സൃഷ്ടിക്കുമെന്നാണ് റഷ്യ മുന്നറിയിപ്പ് നൽകിയിരിക്കുന്നത്. ഇത്തരം വിദേശ ആയുധ കയറ്റുമതികൾ സംഘർഷം വർദ്ധിപ്പിക്കുകയേയുള്ളൂവെന്നും, റഷ്യയുടെ ലക്ഷ്യങ്ങൾ തടയാൻ ലോകത്തിലെ ഏതൊക്കെ ശക്തികൾ ഒന്നിച്ചാലും നടക്കില്ലെന്നും റഷ്യ വെല്ലുവിളിച്ചിരിക്കുകയാണ്. പുതിയ സാഹചര്യത്തിൽ റഷ്യയുടെ ശത്രുപട്ടികയിൽ ഇസ്രായേൽ കൂടി ഇടംപിടിച്ചത് പശ്ചിമേഷ്യയിലെ സംഘർഷങ്ങളെയും ഇനി കാര്യമായി സ്വാധീനിക്കും.
