മലപ്പുറം: മലപ്പുറം: മണ്ണാർമലയിൽ പുലിയുടെ സാന്നിധ്യം വീണ്ടും സ്ഥിരീകരിച്ചു. കഴിഞ്ഞ ഞായറാഴ്ച പുലർച്ചെ മൂന്ന് തവണയാണ് പുലി ക്യാമറയിൽ പതിഞ്ഞത്. ഇതിന് സമീപത്ത് തന്നെ വനംവകുപ്പ് കെണി സ്ഥാപിച്ചിരുന്നെങ്കിലും പുലി കുടുങ്ങിയില്ല. രണ്ടാഴ്ചത്തെ ഇടവേളയ്ക്ക് ശേഷമാണ് പുലി വീണ്ടും പ്രദേശത്തെത്തിയത്.
സ്ഥിരമായി പുലി വരുന്ന സ്ഥലത്ത് ഇരയെ വെച്ച് സ്ഥാപിച്ച കെണിയിലേക്ക് നോക്കാതെ പുലി നടന്നുപോവുകയായിരുന്നു. പുലർച്ചെ 3:36-ന് റോഡിന്റെ ഭാഗത്തേക്ക് ഇറങ്ങിവരുന്നതും 3:44-ന് തിരികെ കയറി പോകുന്നതും 3:50-ന് വീണ്ടും താഴേക്ക് ഇറങ്ങുന്നതുമായ മൂന്ന് ദൃശ്യങ്ങളാണ് ക്യാമറയിൽ പതിഞ്ഞത്. റോഡിന് തൊട്ടടുത്താണ് പുലിയെത്തിയത്.
കഴിഞ്ഞ ആറ് മാസത്തിനിടെ പലതവണ ഇവിടെ പുലിയുടെ സാന്നിധ്യം സ്ഥിരീകരിച്ചിട്ടുണ്ട്. ഞായറാഴ്ച കണ്ട ദൃശ്യങ്ങളിൽ പെൺപുലിയാണെന്ന് സംശയിക്കുന്നു. ഇതോടെ ഒന്നിലധികം പുലികൾ പ്രദേശത്തുണ്ടെന്ന ആശങ്കയും ശക്തമായി.
കഴിഞ്ഞ ദിവസം മണ്ണാർമല പീടികപ്പടിയിലും വേങ്ങൂർ വലിയ തൊടികുന്നിലും പുലിയെ കണ്ടതായി നാട്ടുകാർ പറഞ്ഞിരുന്നു. പട്ടിക്കാട് റോഡിന് കുറുകെ ഓടി ബൈക്കിൽ തട്ടി ബൈക്ക് യാത്രക്കാരന് പരിക്കേൽക്കുകയും ചെയ്തിരുന്നു. പുലിയെ പിടികൂടാത്തതിൽ നാട്ടുകാരുടെ പ്രതിഷേധം ശക്തമാണ്.
