ആലപ്പുഴ:സംസ്ഥാന സർക്കാർ നെഹ്റു ട്രോഫി വള്ളംകളിക്ക് ഇത്തവണ 10 കോടി രൂപ അനുവദിച്ചു. ഇത് ചരിത്രത്തിൽ ആദ്യമായാണ് ഒരു സർക്കാർ ഇത്രയും വലിയ തുക വള്ളംകളിക്കായി അനുവദിക്കുന്നത്. ടൂറിസം മന്ത്രി പി.എ. മുഹമ്മദ് റിയാസ് ആണ് ഇക്കാര്യം അറിയിച്ചത്. നവകേരള സദസ്സിന്റെ ഭാഗമായി 7 കോടി രൂപയും, പി.പി. ചിത്തരഞ്ജൻ എം.എൽ.എയുടെ ഫണ്ടിൽ നിന്ന് 2 കോടി രൂപയും, ടൂറിസം വകുപ്പിന്റെ ഫണ്ടിൽ നിന്ന് ഒരു കോടി രൂപയും ഉൾപ്പെടെയാണ് ഈ തുക അനുവദിച്ചത്.
നെഹ്റു ട്രോഫിയെ കേരളത്തിന്റെ ഒരു പ്രധാന ടൂറിസം ഉത്പന്നമായി മാറ്റാനാണ് സർക്കാർ ലക്ഷ്യമിടുന്നതെന്നും, ഈ വള്ളംകളിയെ കണ്ണിലെ കൃഷ്ണമണി പോലെ സംരക്ഷിക്കുമെന്നും മന്ത്രി പറഞ്ഞു. അധികം വൈകാതെ ചാമ്പ്യൻസ് ബോട്ട് ലീഗ് ആലപ്പുഴയിൽ നിന്ന് തന്നെ തുടങ്ങുമെന്നും അദ്ദേഹം കൂട്ടിച്ചേർത്തു.
8 വള്ളങ്ങളുമായി തുടങ്ങിയ വള്ളംകളിയിൽ ഇന്ന് 21 ചുണ്ടൻ വള്ളങ്ങൾ ഉൾപ്പെടെ 71 വള്ളങ്ങളാണ് മത്സരിക്കുന്നത്. ഇത് ഏറെ ആവേശകരമായ അനുഭവമാണ്. വള്ളംകളിക്ക് വലിയ പ്രാധാന്യമാണ് സർക്കാർ നൽകുന്നതെന്നും മന്ത്രി പറഞ്ഞു.
വേമ്പനാട് കായലിൽ നിന്ന് 30 ടൺ മാലിന്യം നീക്കം ചെയ്ത ജില്ലാ ഭരണകൂടത്തെയും ടൂറിസം വകുപ്പിനെയും മന്ത്രി അഭിനന്ദിച്ചു. സിംബാബ്വെ വ്യവസായ, വാണിജ്യ ഡെപ്യൂട്ടി മന്ത്രി രാജേഷ് കുമാർ ഇന്ദുകാന്ത് മോദി വള്ളങ്ങളുടെ ഫ്ലാഗ് ഓഫ് നിർവഹിച്ചു.
