ഇടുക്കി: ഇടുക്കി: കെഎസ്ഇബിയുടെ എതിർപ്പുമൂലം ഇടുക്കി ജില്ലാ പഞ്ചായത്തിന് ലഭിക്കേണ്ട നൂറ് ഏക്കറോളം ഭൂമി പതിറ്റാണ്ടുകളായി തടസ്സപ്പെട്ടു കിടക്കുന്നു. ജില്ലാ ആസ്ഥാനത്തിന്റെ വികസനത്തിനായി 1980-ൽ 474 ഹെക്ടർ ഭൂമി ഇടുക്കി വികസന അതോറിറ്റിക്ക് കൈമാറാൻ സർക്കാർ ഉത്തരവിട്ടിരുന്നു.
എന്നാൽ വനംവകുപ്പിന്റെ എതിർപ്പുമൂലം 1996-ലാണ് ഈ കൈമാറ്റം നടന്നത്. 2007-ൽ വികസന അതോറിറ്റി പിരിച്ചുവിട്ട ശേഷം, ഈ സ്ഥലം ജില്ലാ പഞ്ചായത്തിന് നൽകി. കെഎസ്ഇബിക്ക് വനംവകുപ്പ് പാട്ടത്തിന് നൽകിയിരുന്ന നൂറ് ഏക്കറോളം സ്ഥലവും ഇതിൽ ഉൾപ്പെട്ടിരുന്നു.
എന്നാൽ, ഈ സ്ഥലം കൈമാറാൻ കെഎസ്ഇബി തയ്യാറായില്ല. വനംവകുപ്പിന് പാട്ടം നൽകുന്ന സ്ഥലമായതുകൊണ്ട് ഇത് വിട്ടുകൊടുക്കാനാവില്ലെന്നാണ് കെഎസ്ഇബിയുടെ നിലപാട്. 2019-ൽ ജില്ലാ കളക്ടർ വിളിച്ചുചേർത്ത യോഗത്തിൽ 12 ഹെക്ടർ ഒഴികെയുള്ള ഭൂമി കൈമാറാൻ തീരുമാനിച്ചു.
ഇതിനായി കെഎസ്ഇബി നിർമ്മിച്ച കെട്ടിടങ്ങളുടെ നഷ്ടപരിഹാരമായി 29 ലക്ഷം രൂപ ജില്ലാ പഞ്ചായത്ത് അടയ്ക്കുകയും ചെയ്തു. എന്നാൽ, ഹൈപവർ കമ്മിറ്റിയുടെ അംഗീകാരത്തിനായി സമർപ്പിച്ചപ്പോൾ കെഎസ്ഇബി വീണ്ടും തർക്കം ഉന്നയിച്ചു. കഴിഞ്ഞ ദിവസം ചീഫ് സെക്രട്ടറി വിളിച്ചുചേർത്ത യോഗത്തിലും കെഎസ്ഇബി നിലപാട് മാറ്റാൻ തയ്യാറായില്ല.
ഇപ്പോൾ തർക്കത്തിലുള്ള ഈ സ്ഥലം ഭൂരിഭാഗവും കാടുപിടിച്ച് നശിക്കുകയാണ്. കെട്ടിടങ്ങളെല്ലാം തകരാറായി. ചെറുതോണി ടൗണിന് സമീപമുള്ള ഈ 75 ഏക്കറോളം സ്ഥലം ലഭിച്ചാൽ ജില്ലാ പഞ്ചായത്തിന് വിവിധ വികസന പ്രവർത്തനങ്ങൾ നടത്താൻ സാധിക്കും. പ്രശ്നപരിഹാരത്തിനായി ഈ ഫയൽ മുഖ്യമന്ത്രിക്ക് കൈമാറാൻ കഴിഞ്ഞ ദിവസത്തെ യോഗത്തിൽ ധാരണയായിട്ടുണ്ട്.
