കാന്തപുരത്തിന്റെ വാദം ചരിത്രത്തോടുള്ള വെല്ലുവിളിയാണ്. ചരിത്രത്തിന്റെ താളുകളിലൂടെ കണ്ണോടിച്ചാൽ, ഒരു സമൂഹത്തിന്റെ സംസ്കാരവും കരുത്തും അളക്കപ്പെടുന്നത് അവിടത്തെ സ്ത്രീകളുടെ സ്വാതന്ത്ര്യവും പങ്കാളിത്തവും മുൻനിർത്തിയാണ്. വീടിന്റെ നാലുചുവരുകൾക്കുള്ളിൽ ഒതുങ്ങിക്കൂടേണ്ടവളല്ല സ്ത്രീ മറിച്ച് ഈ ലോകത്തെ നയിക്കാനും തിരുത്താനും ഒരേപോലെ ശേഷിയുള്ള ശക്തിയാണ് അവൾ. കാലം മാറുമ്പോൾ ആശയങ്ങളും മാറേണ്ടതുണ്ട്.
എന്നാൽ പണ്ടെന്നോ നിലനിന്നിരുന്ന ചില സങ്കുചിത ചിന്തകളെ ഇന്നത്തെ കാലഘട്ടത്തിലേക്ക് അടിച്ചേൽപ്പിക്കാൻ ശ്രമിക്കുന്നത് പുരോഗമനപരമായ ഒരു സമൂഹത്തിന് ഭൂഷണമല്ല. പെണ്ണുങ്ങൾ പൊതുരംഗത്തേക്ക് ഇറങ്ങിയാൽ വലിയ നാശമുണ്ടാകുമെന്നും അവർ വീടുകളിൽ തന്നെ അടങ്ങി ഒതുങ്ങി കഴിയണമെന്നുമുള്ള കാന്തപുരം എ പി അബൂബക്കർ മുസ്ലിയാരുടെ വാദങ്ങൾ കേവലം യാഥാസ്ഥിതികത മാത്രമല്ല,
ചരിത്രത്തെയോ യാഥാർത്ഥ്യത്തെയോ അംഗീകരിക്കാൻ തയ്യാറാകാത്തതിന്റെ തെളിവുകൂടിയാണ്. മതത്തിന്റെ പേരുംപറഞ്ഞ് സ്ത്രീകളെ നാലുചുവരുകൾക്കുള്ളിൽ തളച്ചിടാൻ നോക്കുന്ന ഇത്തരം പ്രസ്താവനകൾ ഇരുണ്ട കാലഘട്ടത്തിന്റെ ഓർമ്മപ്പെടുത്തലുകളാണ്. എന്നാൽ, ഇസ്ലാമിന്റെ പ്രാരംഭ കാലഘട്ടത്തിൽ തന്നെ ആഇശ ബീവി ഉൾപ്പെടെയുള്ളവർ യുദ്ധരംഗത്തും,
രാഷ്ട്രമീമാസയിലും, വിദ്യാഭ്യാസ രംഗത്തും വഹിച്ച പങ്കുകൾ ചരിത്രത്തിന്റെ ഭാഗമാണ്. പ്രവാചക കാലഘട്ടത്തിൽ തന്നെ ബിസിനസ്സിലും പൊതുജീവിതത്തിലും തങ്ങളുടേതായ മുദ്ര പതിപ്പിച്ചവരാണ് ആദ്യകാല മുസ്ലിം സ്ത്രീകൾ. അങ്ങനെയൊക്കെയുള്ളപ്പോൾ, ഇസ്ലാമിന്റെ പേരുപറഞ്ഞ് സ്ത്രീകളുടെ സ്വാതന്ത്ര്യത്തെയും, മുന്നേറ്റത്തെയും ചോദ്യം ചെയ്യുന്നത് ചരിത്രത്തോടും ആ ആദർശങ്ങളോടും ചെയ്യുന്ന നീതികേടാണ്.
ഇന്നത്തെ കേരളം കാണുക. ഭരണരംഗത്തും, ശാസ്ത്രത്തിലും, കലയിലും, വ്യവസായത്തിലും, പൊലീസിലും, രാഷ്ട്രീയത്തിലും തങ്ങളുടെ കഴിവ് തെളിയിച്ച് മുൻനിരയിൽ നിൽക്കുന്നവരാണ് ഇവിടുത്തെ പെൺകുട്ടികൾ. അറിവും ആത്മവിശ്വാസവും കൈമുതലായുള്ള ഒരു തലമുറയെ പിന്നോട്ട് വലിക്കാൻ യാതൊരുവിധ യാഥാസ്ഥിതിക ചിന്തകൾക്കും,
കാന്തപുരത്തെപ്പോലുള്ളവരുടെ ഇത്തരം പഴഞ്ചൻ പ്രസ്താവനകൾക്കും സാധിക്കില്ല. വീടുകൾക്കകം മാത്രമല്ല, പുറംലോകവും അവർക്ക് കീഴടക്കാനുള്ള ഇടങ്ങളാണ്. സ്ത്രീ എന്നത് ഒരു കുടുംബത്തിന്റെ മാത്രമല്ല, ഒരു രാജ്യത്തിന്റെ തന്നെ നട്ടെല്ലാണ്. അവളെ ഒതുക്കിവെക്കാനുള്ള ഏത് ശ്രമവും പരാജയപ്പെടാൻ വിധിക്കപ്പെട്ടതാണ്.
കാരണം, അറിവിന്റെയും സ്വാതന്ത്ര്യത്തിന്റെയും വെളിച്ചം കണ്ടുതുടങ്ങിയ ഒരു തലമുറ ഇനി ഒരിക്കലും ഇരുട്ടിലേക്ക് തിരിച്ചുനടക്കില്ല. സ്ത്രീ ശാക്തീകരണമെന്നത് ആരുടെയും ദാനമല്ല, മറിച്ച് ഓരോ മനുഷ്യന്റെയും ജന്മാവകാശമാണ്. വീടിന്റെ അകത്തളങ്ങളിൽ ഒതുങ്ങേണ്ടതല്ല സ്ത്രീയുടെ കരുത്ത്. ലോകത്തെ നയിക്കാനുള്ള ഇച്ഛാശക്തി അവളിലുണ്ട്.
അറിവും ആത്മവിശ്വാസവും കൈമുതലായുള്ള ഒരു പെണ്ണിനെ പിന്നോട്ട് വലിക്കാൻ ഒരു കാലഘട്ടത്തിന്റെയും പഴഞ്ചൻ ചിന്തകൾക്കാവില്ല. ചരിത്രവും വർത്തമാനവും സാക്ഷിയാണ്; സ്ത്രീ മുന്നോട്ട് വെക്കുന്ന ഓരോ ചുവടും ഈ സമൂഹത്തിന്റെ വളർച്ചയ്ക്കുള്ളതാണ്.
സിന്ധു രാജീവ്
