ന്യൂഡൽഹി: രാജ്യത്ത് പ്രതിഷേധം ശക്തമാകുന്നതിനിടയിലും ജനങ്ങൾക്ക് മേൽ വീണ്ടും ഇന്ധനവില വർദ്ധനവ് അടിച്ചേൽപ്പിക്കാൻ ഒരുങ്ങി എണ്ണക്കമ്പനികൾ. കഴിഞ്ഞ രണ്ടാഴ്ചയ്ക്കുള്ളിൽ നാല് തവണയായി എട്ട് രൂപയോളം കൂട്ടിയെങ്കിലും, ഇന്ധനവില ഇനിയും ഉയർന്നേക്കുമെന്നാണ് ദേശീയ മാധ്യമങ്ങൾ റിപ്പോർട്ട് ചെയ്യുന്നത്. ആകെ വർദ്ധനവ് പത്ത് രൂപയിൽ എത്തിക്കുന്ന രീതിയിൽ അടുത്ത ദിവസങ്ങളിൽ തന്നെ ഒരു തവണ കൂടി വില കൂട്ടിയേക്കുമെന്നാണ് സൂചന.
ഇന്ധനവിലയ്ക്ക് പിന്നാലെ രാജ്യത്ത് സി.എൻ.ജി (CNG) വിലയും വീണ്ടും വർദ്ധിപ്പിച്ചു. തലസ്ഥാനമായ ഡൽഹിയിൽ സി.എൻ.ജി വില കിലോയ്ക്ക് രണ്ട് രൂപയാണ് കൂട്ടിയത്.പുതിയ നിരക്ക് (ഡൽഹിയിൽ): 83.09 രൂപ (കിലോയ്ക്ക്)വർദ്ധനവ് കഴിഞ്ഞ 11 ദിവസത്തിനുള്ളിൽ മാത്രം 7 രൂപയുടെ വർദ്ധനവാണ് രേഖപ്പെടുത്തിയത്. രണ്ടാഴ്ചയ്ക്കിടെയുണ്ടാകുന്ന നാലാമത്തെ വിലവർദ്ധനവാണിത്.തുടർച്ചയായ വിലവർദ്ധനവിനെതിരെ കേരളത്തിൽ സംസ്ഥാന വ്യാപകമായി വിവിധ രാഷ്ട്രീയ പാർട്ടികളുടെ യുവജന സംഘടനകൾ വൻ പ്രതിഷേധത്തിലാണ്.
കാസർകോട് യൂത്ത് കോൺഗ്രസ് പ്രവർത്തകർ കാഞ്ഞങ്ങാട് റെയിൽവേ സ്റ്റേഷനിൽ ട്രെയിൻ തടഞ്ഞ് പ്രതിഷേധിച്ചു. കെ.എസ്.യു പ്രവർത്തകർ കാസർകോട് നഗരത്തിൽ ബൈക്കുകൾ തള്ളി പ്രതിഷേധ പ്രകടനം നടത്തി.തൃശ്ശൂർ ഡി.വൈ.എഫ്.ഐ (DYFI) പ്രവർത്തകർ പാചകവാതക സിലിണ്ടറുകളുമേന്തി തൃശ്ശൂർ നഗരത്തിൽ പ്രതിഷേധിച്ചു. പാറമേക്കാവ് ജംഗ്ഷനിൽ നിന്ന് കോർപ്പറേഷൻ ഓഫീസിന് മുൻപിലേക്ക് ഓട്ടോറിക്ഷകളും ഇരുചക്ര വാഹനങ്ങളും തള്ളിയായിരുന്നു ഇവരുടെ പ്രകടനം.
വിലക്കയറ്റത്തിൽ സാധാരണ ജനങ്ങൾ പൊറുതിമുട്ടുമ്പോഴും ഇന്ധനവില വീണ്ടും കൂട്ടാനുള്ള നീക്കം വരും ദിവസങ്ങളിൽ കൂടുതൽ ശക്തമായ ജനകീയ പ്രതിഷേങ്ങൾക്ക് കാരണമായേക്കും.
