തിരുവനന്തപുരം : ഉപഭോക്താക്കളെ അപകടകരമായ ലിങ്കുകളില് നിന്ന് രക്ഷിക്കുന്നതിനായി പുതിയ ഫീച്ചർ അവതരിപ്പിക്കാൻ തയാറായി വാട്സ്ആപ്പ്. സന്ദേശങ്ങളിലെ ലിങ്കുകൾ വഴി പങ്കിടുന്ന വിവരങ്ങളുടെ കൃത്യത പരിശോധിക്കാൻ ഉപയോക്താക്കളെ സഹായിക്കുന്ന ഫീച്ചർ വാട്ട്സ്ആപ്പ് അവതരിപ്പിച്ചിരിക്കുന്നത്. തെറ്റായ വിവരങ്ങൾ നേരിടാൻ സഹായിക്കുന്നതിന് വാട്ട്സ്ആപ്പിന്റെ പുതിയ ഫാക്ട് ചെക്കിംഗ് ഫീച്ചർ പുറത്തിറക്കുന്നു.
അപ്ലിക്കേഷനിൽ നിന്ന് നേരിട്ട് വെബിൽ തിരഞ്ഞ് വൈറൽ സന്ദേശങ്ങളുടെ കൃത്യത പരിശോധിക്കാൻ ഈ സവിശേഷത ഉപയോക്താക്കളെ അനുവദിക്കുന്നു. അഞ്ചോ അതിലധികമോ ആളുകൾക്ക് ഒരു സന്ദേശം ഫോർവേഡ് ചെയ്തിട്ടുണ്ടെങ്കിൽ, അത് ഒരു വസ്തുതാ പരിശോധന ഓപ്ഷൻ ഉപയോഗിച്ച് അടയാളപ്പെടുത്തും. ഇത് തെറ്റിദ്ധരിപ്പിക്കുന്ന വിവരങ്ങൾ തിരിച്ചറിയുന്നത് എളുപ്പമാക്കുന്നു.
നിലവിൽ ആൻഡ്രോയിഡ് ബീറ്റ പതിപ്പ് 2.24.20.28 ൽ ഈ സവിശേഷത പരീക്ഷിച്ചുകൊണ്ടിരിക്കുകയാണെന്ന് വാബീറ്റ ഇൻഫോ പറയുന്നു. വ്യാജവാർത്തകള് വാട്സ്ആപ്പ് വഴി വ്യാപകമായി പ്രചരിക്കുന്നു. ഈ സാഹചര്യം കണക്കിലെടുത്താണ് ഇത്തരത്തിലുള്ള ഒരു സുരക്ഷാ സംവിധാനം ഒരുക്കാൻ കമ്പനി ശ്രമിക്കുന്നത്. ലിങ്കിൽ ഉള്ള വിവരം എന്താണെന്ന് മാത്രമല്ല, ആ ലിങ്കിനൊടൊപ്പമുള്ള സന്ദേശത്തിലെ ഉള്ളടക്കവും ലിങ്ക് കൊണ്ട് എത്തിക്കുന്ന വെബ്സൈറ്റിലെ ഉള്ളടക്കവും സാമ്യതയുള്ളതാണോയെന്ന് പരിശോധിക്കും.
ഈ പരിശോധന നടത്തുന്നത് ഗൂഗിളിന്റെ സഹായത്തോടെയാണ്. യുആർഎല് അടങ്ങുന്ന ഏതെങ്കിലും സന്ദേശം ലഭിച്ചാൽ ആ ലിങ്ക് ഉപഭോക്താവിന് ഇഷ്ടപ്രകാരം പരിശോധിച്ച് ഉറപ്പിക്കാനുള്ള അവസരവുമുണ്ട്. ഉപഭോക്താവ് ആവശ്യപ്പെടുന്ന ലിങ്കും ആ സന്ദേശവുമാണ് ഇത്തരം സാഹചര്യങ്ങളില് പരിശോധിക്കുന്നത്. ഈ സന്ദേശങ്ങള് സുരക്ഷിതമാണെന്ന പ്രത്യേകതയുമുണ്ട്. ഇത് എങ്ങും സൂക്ഷിക്കുകയുമില്ല. സുരക്ഷിതമല്ലാത്ത വെബ്സൈറ്റുകളിലേക്ക് എത്തിപ്പെടുന്നത് തടയാൻ ഇതുവഴി സാധിക്കും.
