തിരുവനന്തപുരം: സംസ്ഥാനത്ത് നിലവിൽ വൈദ്യുതി പ്രതിസന്ധിയില്ലെന്നും ജി.എൻ.എ (GNA) കമ്പനിയുമായി വൈദ്യുതി വാങ്ങുന്നതിന് കെ.എസ്.ഇ.ബി കരാറിൽ ഏർപ്പെട്ടിട്ടില്ലെന്നും മുഖ്യമന്ത്രി വി.ഡി. സതീശൻ വ്യക്തമാക്കി. വൈദ്യുതി വാങ്ങുന്നതുമായി ബന്ധപ്പെട്ട നിർദേശങ്ങളിൽ സംസ്ഥാനത്തിന് കൂടുതൽ പ്രയോജനകരമായ ഓപ്ഷൻ തിരഞ്ഞെടുക്കാനാണ് നിർദേശം നൽകിയതെന്നും വാർത്താസമ്മേളനത്തിൽ സംസാരിക്കവെ അദ്ദേഹം പറഞ്ഞു.ഹിമാചൽ പ്രദേശിൽ നിന്നും ജി.എൻ.എ കമ്പനിയിൽ നിന്നും വൈദ്യുതി വാങ്ങാനുള്ള നിർദേശങ്ങളാണ് സർക്കാരിന്റെ പരിഗണനയിലുണ്ടായിരുന്നത്.
കൂടുതൽ ലാഭകരമായ രീതി തിരഞ്ഞെടുക്കാനാണ് നിർദേശിച്ചത്.ജി.എൻ.എ കരാറിനെക്കുറിച്ച് അറിയില്ലെന്ന വൈദ്യുതി മന്ത്രി സണ്ണി ജോസഫിന്റെ പ്രസ്താവന മുഖ്യമന്ത്രി തള്ളി. എല്ലാ തീരുമാനങ്ങളും മന്ത്രിയുമായി ആലോചിച്ചാണ് എടുത്തതെന്നും ഫയൽ തനിക്ക് കൈമാറിയതും തിരികെ വാങ്ങിയതും മന്ത്രി തന്നെയാണെന്നും മുഖ്യമന്ത്രി പറഞ്ഞു.കഴിഞ്ഞ മാസങ്ങളിൽ സംസ്ഥാനത്ത് നേരിട്ട പവർകട്ടിന് കാരണം മുൻ സർക്കാരിന്റെ ദീർഘവീക്ഷണമില്ലായ്മയാണെന്ന് മുഖ്യമന്ത്രി കുറ്റപ്പെടുത്തി.
നവംബർ, ഡിസംബർ മാസങ്ങളിൽ വൈദ്യുതി പ്രതിസന്ധിയുണ്ടാകില്ലെന്നാണ് കെ.എസ്.ഇ.ബി അറിയിച്ചിരിക്കുന്നത്. അതിനാൽ ഇപ്പോൾ ഉയർന്ന വില നൽകി വൈദ്യുതി വാങ്ങേണ്ട സാഹചര്യമില്ല.നവംബർ ഒന്നു മുതൽ വൈദ്യുതി പ്രതിസന്ധിയുണ്ടാകുമെന്ന റിപ്പോർട്ടുകൾ ഉയർത്തിക്കാട്ടി തന്റെമേൽ സമ്മർദം ചെലുത്താൻ ശ്രമങ്ങൾ നടന്നതായും മുഖ്യമന്ത്രി ആരോപിച്ചു.
