സ്നേഹത്തിന്റെയും കരുതലിന്റെയും ആൾരൂപമായാണ് സമൂഹം എക്കാലത്തും അമ്മയെ കാണുന്നത്. എന്നാൽ, സമീപകാലത്തായി മാധ്യമങ്ങളിൽ കാണുന്ന ചില വാർത്തകൾ ഈ സങ്കൽപ്പങ്ങളെയാകെ അടിമുടി പിടിച്ചുലയ്ക്കുന്നതാണ്. സ്വന്തം കുഞ്ഞുങ്ങളെ ജീവനോടെ തടവിലാക്കുകയോ, ക്രൂരമായി കൊലപ്പെടുത്തുകയോ ചെയ്യുന്ന അമ്മമാരുടെ വാർത്തകൾ നമ്മുടെ മനഃസാക്ഷിയെ ഞെട്ടിക്കുന്നു….
സ്നേഹത്തിന്റെ പ്രതീകമാകേണ്ട കൈകൾ തന്നെ കുഞ്ഞുങ്ങളുടെ ജീവനെടുക്കുമ്പോൾ, അതൊരു വ്യക്തിയുടെ മാത്രം കുറ്റമായി ചുരുക്കിക്കാണാൻ കഴിയില്ല; മറിച്ച് അതൊരു സാമൂഹിക പ്രശ്നമായി വിലയിരുത്തപ്പെടേണ്ടതുണ്ട്….എന്തുകൊണ്ടാണ് ഒരു അമ്മയ്ക്ക് താൻ പ്രസവിച്ച കുഞ്ഞിനെതിരെ ഇത്രയും ക്രൂരമായ തീരുമാനമെടുക്കേണ്ടി വരുന്നത്? ഈ ചോദ്യത്തിന് പിന്നിൽ വലിയൊരു മാനസിക തകർച്ചയുടെയും സാമൂഹിക ഒറ്റപ്പെടലിന്റെയും കഥയുണ്ട്…..
പ്രസവാനന്തര വിഷാദം, പ്രസവത്തിനു ശേഷമുള്ള ഹോർമോൺ വ്യതിയാനങ്ങളും കടുത്ത മാനസിക സമ്മർദ്ദവും പല അമ്മമാരെയും കടുത്ത വിഷാദത്തിലേക്ക് തള്ളിവിടുന്നു. ഇത് പലപ്പോഴും തിരിച്ചറിയപ്പെടാതെ പോകുന്നതാണ് വലിയ ദുരന്തങ്ങൾക്ക് കാരണമാകുന്നത്.
കുടുംബത്തിലെ പിന്തുണയുടെ കുറവ്: പങ്കാളിയുടെയോ കുടുംബാംഗങ്ങളുടെയോ ഭാഗത്തുനിന്നുള്ള അവഗണനയും മാനസിക പിന്തുണയില്ലായ്മയും അമ്മമാരെ കടുത്ത ഏകാന്തതയിലേക്കും നിരാശയിലേക്കും നയിക്കുന്നു…..
അടുത്തത് സാമൂഹികവും സാമ്പത്തികവുമായ സമ്മർദ്ദങ്ങൾ, ജീവിതത്തിലെ താളംതെറ്റലുകൾ, ദാമ്പത്യ പ്രശ്നങ്ങൾ, സാമ്പത്തിക പരാധീനതകൾ എന്നിവയെല്ലാം ചിലരെ മാനസികാസ്വാസ്ഥ്യങ്ങളിലേക്കും കടുത്ത തീരുമാനങ്ങളിലേക്കും എത്തിച്ചേക്കാം.ഒരു കുഞ്ഞ് ജനിക്കുമ്പോൾ ആ അമ്മയ്ക്കൊപ്പം നിൽക്കേണ്ടത് സമൂഹത്തിന്റെയും കുടുംബത്തിന്റെയും ഉത്തരവാദിത്തമാണ്. അമ്മയുടെ മാനസികാരോഗ്യം കുടുംബത്തിന്റെ മാത്രം വിഷയമല്ല, അതൊരു സാമൂഹികാരോഗ്യ പ്രശ്നമായി കാണണം.
വിഷമങ്ങൾ തുറന്നുപറയാനുള്ള വേദികളോ, കൃത്യമായ കൗൺസിലിംഗ് സൗകര്യങ്ങളോ ഇല്ലാത്തതാണ് പലപ്പോഴും ഇത്തരം അവസ്ഥകളെ വഷളാക്കുന്നത്.ഇത്തരം ദൗർഭാഗ്യകരമായ സംഭവങ്ങൾ ആവർത്തിക്കാതിരിക്കാൻ കുടുംബങ്ങൾ കൂടുതൽ ജാഗ്രത പുലർത്തേണ്ടതുണ്ട്. അമ്മമാരുടെ മാനസികാവസ്ഥയിലെ മാറ്റങ്ങൾ തിരിച്ചറിയാനും, അവർക്ക് ആവശ്യമായ സ്നേഹവും പിന്തുണയും നൽകാനും സമൂഹം തയ്യാറാകണം. കുഞ്ഞുങ്ങളുടെ സുരക്ഷയ്ക്കൊപ്പം തന്നെ അമ്മമാരുടെ മാനസികാരോഗ്യവും സംരക്ഷിക്കപ്പെടേണ്ടത് ഒരു സമൂഹത്തിന്റെ മൊത്തത്തിലുള്ള ബാധ്യതയാണ്…
കുടുംബബന്ധങ്ങളുടെ കെട്ടുറപ്പില്ലായ്മയും അവിഹിത ബന്ധങ്ങളുടെ പിറകെ പോകുന്ന സ്വാർത്ഥതയും കുടുംബങ്ങളെ തകർത്തെറിയുകയാണ്. സ്വന്തം സുഖലോലുപതയ്ക്കായി ചോരക്കുഞ്ഞുങ്ങളെ ഭാരമായി കാണുന്ന മാനസികാവസ്ഥ സമൂഹത്തിന്റെ കടുത്ത അധഃപതനത്തെയാണ് കാണിക്കുന്നത്. ഇവിടെ കൗൺസിലിംഗോ മാനസിക സമ്മർദ്ദമോ അല്ല, മറിച്ച് ധാർമ്മികതയുടെയും മനുഷ്യത്വത്തിന്റെയും സമ്പൂർണ്ണ തിരോധാനമാണ് പ്രശ്നം…
സിന്ധു രാജീവ്
