തിരുവനന്തപുരം: കേരള പി.എസ്.സി. പരീക്ഷാ ക്രമക്കേടുമായി ബന്ധപ്പെട്ട് ബി.ജെ.പി. സംസ്ഥാന നേതൃത്വം ഇന്ന് രാഷ്ട്രപതി ദ്രൗപദി മുർമുവുമായി കൂടിക്കാഴ്ച നടത്തും. ഉച്ചയ്ക്ക് 12 മണിക്ക് ബി.ജെ.പി. സംസ്ഥാന അധ്യക്ഷൻ രാജീവ് ചന്ദ്രശേഖർ, എം.പി.മാരായ സി. സദാനന്ദൻ, പി.ടി. ഉഷ എന്നിവരുടെ നേതൃത്വത്തിലാണ് രാഷ്ട്രപതിയെ കാണുന്നത്. മുൻ ഗവർണർ രാജേന്ദ്ര വിശ്വനാഥ അർലേക്കർ രാഷ്ട്രപതിക്ക് നൽകിയ ശിപാർശക്കത്തിന്റെ അടിസ്ഥാനത്തിൽ വിഷയത്തിൽ അടിയന്തര ഇടപെടൽ ആവശ്യപ്പെടാനാണ് കൂടിക്കാഴ്ച.
അതിനിടെ, പി.എസ്.സി. ചെയർമാനെയും അംഗങ്ങളെയും പിരിച്ചുവിടണമെന്ന മുൻ ഗവർണറുടെ നിലപാടിനെ പിന്തുണച്ച് നിലവിലെ ഗവർണർ ഓം പ്രകാശ് മാഥൂറും രാഷ്ട്രപതിക്ക് കത്തയച്ചു. കേരള ഗവർണർ സ്ഥാനത്തുനിന്ന് ഒഴിയുന്നതിന് തൊട്ടുമുൻപാണ് രാജേന്ദ്ര വിശ്വനാഥ അർലേക്കർ പി.എസ്.സി. ഭാരവാഹികളെ പുറത്താക്കണമെന്ന് ആവശ്യപ്പെട്ട് അസാധാരണ നടപടിയുമായി രാഷ്ട്രപതിക്ക് ശിപാർശ നൽകിയത്. സംസ്ഥാന ചരിത്രത്തിലാദ്യമായാണ് ഒരു ഗവർണർ ഇത്തരമൊരു നീക്കം നടത്തുന്നത്.
പി.എസ്.സി. പരീക്ഷാ ക്രമക്കേടിൽ അന്വേഷണം പുരോഗമിക്കവേ ചെയർമാനും അംഗങ്ങളും സംശയനിഴലിലാണെന്നും കാലാവധി പൂർത്തിയാകുന്നതിന് മുൻപ് ഇവരെ നീക്കണമെന്നുമാണ് ഭരണഘടനയുടെ ആർട്ടിക്കിൾ 317 പ്രകാരം ഗവർണർ ആവശ്യപ്പെട്ടിരുന്നത്.എന്നാൽ, സംസ്ഥാന മന്ത്രിസഭയുടെ ഉപദേശമില്ലാതെ മുൻ ഗവർണർ നൽകിയ ശിപാർശ മുഖ്യമന്ത്രി വി.ഡി. സതീശൻ തള്ളി. സർക്കാരിനെ അറിയിക്കാതെ നൽകിയ ശിപാർശ അംഗീകരിക്കാൻ കഴിയില്ലെന്നും എന്നാൽ പി.എസ്.സി.യിൽ ക്രമക്കേടുകൾ നടന്നിട്ടുണ്ടെന്നാണ് സർക്കാരിന്റെയും അഭിപ്രായമെന്നും മുഖ്യമന്ത്രി വ്യക്തമാക്കി.
