കോട്ടയം:വരും ദിവസങ്ങളിൽ ഉയർന്ന താപനിലക്ക് സാധ്യത, അന്തരീക്ഷ താപനില ഉയരുന്ന സാഹചര്യത്തില് മുന്കരുതല് എടുക്കേണ്ടതുണ്ട് എന്നും ആരോഗ്യ വകുപ്പ് അറിയിച്ചു. 65 വയസിനു മുകളില് പ്രായമുള്ളവര്, കുട്ടികള്, ഹൃദ്രോഗം പോലുള്ള രോഗമുള്ളവര്, കഠിന ജോലികള് ചെയ്യുന്നവര് എന്നിവര്ക്ക് പ്രത്യേക കരുതലും സംരക്ഷണവും വേണം. കുടിക്കുന്നത് ശുദ്ധജലമാണെന്ന് ഉറപ്പുവരുത്തണം.
എന്തെങ്കിലും ശാരീരിക ബുദ്ധിമുട്ട് തോന്നിയാല് ഉടന് ചികിത്സ തേടണം. ചിക്കന് പോക്സ്, വയറിളക്ക രോഗങ്ങള് എന്നിവയ്ക്കെതിരേയും ജാഗ്രത പുലര്ത്തണം.അന്തരീക്ഷതാപം ഒരു പരിധിക്കപ്പുറം ഉയര്ന്നാല് മനുഷ്യശരീരത്തിലെ താപനിയന്ത്രണ സംവിധാനങ്ങള് തകരാറിലാവുകയും ഇതുമൂലം ശരീരത്തില് ഉണ്ടാകുന്ന താപം പുറത്ത് കളയുന്നതിന് തടസം നേരിടുകയും ചെയ്യും. ഇത് ശരീരത്തിന്റെ പല നിര്ണായക പ്രവര്ത്തനങ്ങളെയും തകരാറിലാക്കും.
ഈ അവസ്ഥയാണ് സൂര്യാഘാതം.വളരെ ഉയര്ന്ന ശരീരതാപം,വറ്റിവരണ്ട ചുവന്ന ചൂടായ ശരീരം, ശക്തമായ തലവേദന, തലകറക്കം, മന്ദഗതിയിലുള്ള നാഡിമിടിപ്പ്, മാനസികാവസ്ഥയിലുള്ള മാറ്റങ്ങള് എന്നിവയോടൊപ്പം ചിലപ്പോള് അബോധാവസ്ഥയും കാണപ്പെടാം. ഈ ലക്ഷണങ്ങള് കാണുകയാണെങ്കില് ഡോക്ടറുടെ സേവനം ഉടനടി ലഭ്യമാക്കണം.
സൂര്യാഘാതത്തെക്കാള് കാഠിന്യം കുറഞ്ഞ അവസ്ഥയാണ് സൂര്യാതപം. വെയിൽ പൊള്ളലേല്ക്കുന്ന ഭാഗത്തുണ്ടാകുന്ന കുമിളകള് പൊട്ടിക്കാന് പാടില്ല.ക്ഷീണം, തലകറക്കം, തലവേദന, പേശിവലിവ്, ഓക്കാനവും ഛര്ദ്ദിയും, അസാധാരണമായ വിയര്പ്പ്, കഠിനമായ ദാഹം, മൂത്രത്തിന്റെ അളവ് തീരെ കുറയുകയും കടും മഞ്ഞനിറം ആവുകയും ചെയ്യുക, ബോധക്ഷയം എന്നിവയാണ് പ്രധാന ലക്ഷണങ്ങള്.
