കാട്ടാക്കട:ജൽജീവൻ പദ്ധതിയുടെ ഭാഗമായി മുറിച്ച ഭാഗങ്ങളിൽ പലയിടത്തും കണക്ഷൻ നൽകിയില്ല. മറ്റ് ചിലയിടത്ത് വെള്ളം ഒഴുക്കിക്കളയുന്നു. കാട്ടാക്കട- നെയ്യാർഡാം റോഡിൽ കാട്ടാക്കട ക്ഷീരസംഘത്തിനു സമീപത്താണ് ജല അതോറിറ്റിയുടെ പൈപ്പിൽനിന്ന് വെള്ളം ഓടയിലൂടെ ഒഴുക്കുന്നത്.ഗ്രാമീണ മേഖലയിൽ ജലവിതരണം തടസ്സപ്പെടുന്നത് സംബന്ധിച്ചോ, തടസ്സപ്പെട്ടാൽ എപ്പോൾ കിട്ടുമെന്നോ ആർക്കും ഒരു നിശ്ചയവുമില്ല.പ്രദേശത്ത് ശുദ്ധജല ക്ഷാമം രൂക്ഷമായി തുടരുമ്ബോഴും ജല അതോറിറ്റിയുടെ ജലവിതരണത്തിൽ ക്രമക്കേട്. പൈപ്പുവെള്ളത്തെ ആശ്രയിക്കുന്നവർ സമീപത്തെ വീടുകളിലെ കിണറുകളിൽ നിന്ന് ജലം ശേഖരിക്കേണ്ട സ്ഥിതിയാണ്.
കാട്ടാക്കട പട്ടണം, തൂങ്ങാംപാറ, ചെട്ടിക്കോണം, മാവുവിള, ചെമ്ബനാകോട്, കിള്ളി, കാനക്കോട്, കാരീഞ്ചൽ, കൊറ്റംപള്ളി, വില്ലിടുംപാറ, കട്ടയോട്, നാടുകാണി തുടങ്ങിയ പ്രദേശങ്ങളിലൊന്നും ജലവിതരണം കാര്യക്ഷമമല്ലെന്നാണ്. ഇക്കാര്യത്തിൽ ഉദ്യോഗസ്ഥ തലത്തിലുള്ള അലംഭാവമാണ് കാട്ടാക്കടയിൽ ജലവിതരണം മുടങ്ങാൻ കാരണമായി ആരോപണമുള്ളത്. കുടിവെള്ളം മുടങ്ങുമ്ബോൾ കാട്ടാക്കടയിലെ സെക്ഷൻ ഓഫിസിൽ പരാതിപ്പെട്ടാൽ നെയ്യാറ്റിൻകര അസിസ്റ്റന്റ് എക്സിക്യൂട്ടിവ് എൻജിനീയറോടോ എക്സിക്യൂട്ടിവ് എൻജിനീയറോടോ പരാതി പറഞ്ഞാൽ കാട്ടാക്കട ഓഫിസിൽ വിളിക്കാനാകും ഉപദേശം. വർഷങ്ങളായി സ്കീം നോക്കുന്ന കരാറുകാരനെ വിളിച്ചാൽ ഫോൺ എടുക്കില്ല. ആരോട് പരാതി പറഞ്ഞാലാണ് കുടിവെള്ളം കിട്ടുകയെന്ന ചോദ്യത്തിന് അധികൃതർക്ക് മറുപടിയില്ല.
നെയ്യാർഡാം കാളിപാറയിലെ ജല അതോറിറ്റിയുടെ ജല ശുദ്ധീകരണശാലയിൽനിന്ന് നെയ്യാറ്റിൻകരയിലേക്ക് പോകുന്ന 700 എം.എം.ഡി.ഐ ഗ്രാവിറ്റി പ്രധാന പൈപ്പിൽ തൂങ്ങാംപാറയിലെ വാൽവ് നിയന്ത്രിച്ചാണ് കാട്ടാക്കടയുടെ വിവിധ ഭാഗങ്ങളിൽ വെള്ളം എത്തിക്കുന്നത്. ആഴ്ചയിൽ രണ്ടുദിവസം കാട്ടാക്കടയിലേക്ക് ഈ വാൽവ് പ്രവർത്തിപ്പിച്ചാൽ മാത്രമേ പഞ്ചായത്ത് പ്രദേശത്ത് ജലവിതരണം സുഗമമായി നടക്കൂ. എന്നാൽ, നെയ്യാറ്റിൻകര പ്രദേശത്തേക്കുള്ള ജലവിതരണത്തിൽ ഈ പ്രശ്നം ഉണ്ടാകുന്നില്ല. വേനൽ തുടങ്ങിയപ്പോൾ ഇത്തരത്തിൽ ജലവിതരണം മുടങ്ങിയാൽ പ്രദേശത്ത് കുടിവെള്ളം കിട്ടാതാകുമെന്ന സ്ഥിതിയാണ്.
