തിരുവനന്തപുരം: കേന്ദ്ര സർക്കാരിന്റെ പി.എം. ശ്രീ പദ്ധതിയിൽ കേരളം തുടരാൻ നിർബന്ധിത സാഹചര്യമാണെന്ന് മുഖ്യമന്ത്രി വി.ഡി. സതീശൻ വാർത്താസമ്മേളനത്തിൽ പറഞ്ഞു. സംസ്ഥാനത്തിന്റെ വിദ്യാഭ്യാസ അവകാശങ്ങൾ ബലി കഴിക്കാതിരിക്കാനാണ് സർക്കാർ ശ്രമിക്കുന്നത്. നിലവിൽ കേരളം ഈ പദ്ധതിയിൽ അംഗമാണ്. പദ്ധതിയുമായി ബന്ധപ്പെട്ട് നേരത്തെ കരാറിൽ ഒപ്പുവെച്ച മറ്റ് ബി.ജെ.പി. ഇതര സംസ്ഥാനങ്ങളുമായി സർക്കാർ ചർച്ചകൾ നടത്തിയിട്ടുണ്ടെന്നും മുഖ്യമന്ത്രി വ്യക്തമാക്കി.
പദ്ധതിയിൽ ഒപ്പുവെക്കില്ലെന്ന് മുൻപ് പ്രഖ്യാപിച്ചിരുന്നതാണെങ്കിലും, മന്ത്രിസഭ അറിയാതെയാണ് കഴിഞ്ഞ എൽ.ഡി.എഫ്. സർക്കാർ ഇതിൽ ഒപ്പുവെച്ചതെന്ന് മുഖ്യമന്ത്രി വെളിപ്പെടുത്തി. നിലവിൽ 1100 കോടി രൂപയോളം കേന്ദ്രത്തിൽ നിന്ന് കേരളത്തിന് പദ്ധതി വിഹിതമായി ലഭിക്കാനുണ്ട്. ഇത് കേന്ദ്രത്തിന്റെ ഔദാര്യമല്ല, മറിച്ച് കേരളത്തിന്റെ അവകാശമാണ്. സംസ്ഥാനത്തിന്റെ അവകാശങ്ങൾ ബലികഴിക്കാതെയും കേന്ദ്രത്തിന്റെ വർഗീയ അജണ്ടകൾക്ക് വഴങ്ങാതെയും ഈ പദ്ധതി എങ്ങനെ മുന്നോട്ട് കൊണ്ടുപോകാനാകും എന്നതിനെക്കുറിച്ച് സർക്കാർ ഗൗരവമായി ആലോചിക്കുമെന്നും മുഖ്യമന്ത്രി കൂട്ടിച്ചേർത്തു.
