മയ്യിൽ : മയ്യിൽ ടൗൺ അടിസ്ഥാന സൗകര്യങ്ങളില്ലാതെ ദുരിതത്തിലായി. റോഡിന്റെ വീതിക്കുറവും വാഹനങ്ങൾക്ക് മതിയായ പാർക്കിങ് സൗകര്യമില്ലാത്തതുമാണ് ടൗൺ നേരിടുന്ന പ്രധാന പ്രശ്നങ്ങൾ. ഇത് പതിവായ ഗതാഗതക്കുരുക്കിന് കാരണമാകുന്നു. ഫുട്പാത്തുകളിലും റോഡരികിലും വാഹനങ്ങൾ നിർത്തിയിടുന്നത് ഗതാഗതം കൂടുതൽ തടസ്സപ്പെടുത്തുന്നു.
ഗതാഗതക്കുരുക്ക് പരിഹരിക്കാൻ മൂന്നുതവണ ശ്രമങ്ങൾ നടന്നെങ്കിലും ഫലം കണ്ടില്ല. മെഡിക്കൽ കോളേജ് ആശുപത്രിയിലേക്കുള്ള ആംബുലൻസ് ഉൾപ്പെടെ, ശ്രീകണ്ഠാപുരം, ഇരിക്കൂർ, ചാലോട്, പയ്യന്നൂർ, തളിപ്പറമ്പ് എന്നിവിടങ്ങളിൽ നിന്നുള്ള വാഹനങ്ങൾ ഈ ടൗൺ വഴിയാണ് കടന്നുപോകുന്നത്.
ജില്ലയിൽ ഏറ്റവും കൂടുതൽ വിദ്യാർത്ഥികൾ പഠിക്കുന്ന സർക്കാർ ഹയർ സെക്കൻഡറി സ്കൂൾ, പോലീസ് സ്റ്റേഷൻ, വിദ്യാഭ്യാസ ഓഫീസ്, സാമൂഹികാരോഗ്യ കേന്ദ്രം തുടങ്ങി നിരവധി സർക്കാർ സ്ഥാപനങ്ങളും ബാങ്കുകളും ഈ ടൗണിൽ പ്രവർത്തിക്കുന്നുണ്ട്.
എന്നിട്ടും, പൊതുശൗചാലയങ്ങൾ പോലെയുള്ള അടിസ്ഥാന സൗകര്യങ്ങൾ ഇവിടെയില്ല. ഗതാഗതക്കുരുക്കിന് പരിഹാരം കാണുന്നതിനൊപ്പം ഒരു പൊതുശൗചാലയം സ്ഥാപിക്കണമെന്നാണ് നാട്ടുകാരുടെ പ്രധാന ആവശ്യം.
