തിരുവനന്തപുരം : ജീവനക്കാരെ അന്യായമായി സ്ഥലം മാറ്റിയതിനെ തുടർന്ന് രണ്ട് സർക്കാർ ഉദ്യോഗസ്ഥർ മരിച്ച സംഭവത്തിൽ സർക്കാരിനും മുഖ്യമന്ത്രിക്കുമെതിരെ രൂക്ഷവിമർശനവുമായി പ്രതിപക്ഷ നേതാവ് പിണറായി വിജയൻ. എഫ്എസ്ഇടിഒ സംഘടിപ്പിച്ച സെക്രട്ടേറിയറ്റ് മാർച്ച് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
സ്ഥലംമാറ്റങ്ങൾ ഉദ്യോഗസ്ഥരെ എത്രത്തോളം മാനസികമായി തകർക്കുന്നു എന്നതിന്റെ തെളിവാണ് സംസ്ഥാനത്ത് അടുത്തിടെയുണ്ടായ മരണങ്ങളെന്ന് അദ്ദേഹം ചൂണ്ടിക്കാട്ടി. മുൻകാലങ്ങളിൽ കൃത്യമായ മാനദണ്ഡങ്ങളോടെയാണ് സ്ഥലംമാറ്റങ്ങൾ നടന്നിരുന്നത്. എന്നാൽ ഇപ്പോൾ എല്ലാ മാനദണ്ഡങ്ങളും പൂർണ്ണമായും ഒഴിവാക്കി.
ഭരണാധികാരികളുടെ ഹുങ്കാണ് ഇതിന് കാരണം. തിരഞ്ഞെടുപ്പ് ഫലം വന്നയുടൻ ഭരണാനുകൂല സംഘടനകൾ സ്വന്തം ലെറ്റർ പാഡിൽ നൽകിയ ലിസ്റ്റ് അനുസരിച്ചാണ് ഉദ്യോഗസ്ഥരെ സ്ഥലം മാറ്റുന്നത്. ഉദ്യോഗസ്ഥർ അത് അതേപടി ഉത്തരവായി ഇറക്കുകയാണെന്നും ഇതിന് പിന്നിൽ വൻ അഴിമതിയുണ്ടെന്നും പിണറായി വിജയൻ ആരോപിച്ചു.
ഹെൽത്ത് ഇൻസ്പെക്ടർ ദീപയും കാസർകോട്ടെ ആശാലതയും സർക്കാരിന്റെ ഈ നടപടിയുടെ ഇരകളാണ്. ആശാലത ജീവിതം അവസാനിപ്പിക്കാൻ കാരണം സ്ഥലംമാറ്റമാണെന്ന വിവരങ്ങളാണ് പുറത്തുവരുന്നത്. സിവിൽ സർവീസിന്റെ രക്ഷാധികാരിയാകേണ്ട മുഖ്യമന്ത്രി തന്നെ ഇനിയും സ്ഥലംമാറ്റങ്ങൾ ഉണ്ടാകും എന്ന് പരസ്യമായി ഭീഷണിപ്പെടുത്തുകയാണ്.
ജീവനക്കാരെ ഭയപ്പെടുത്തി ഭരിക്കാനാണ് സർക്കാർ ശ്രമിക്കുന്നത്. ഭരണാനുകൂല സംഘടനകൾക്ക് എന്തുമാകാം എന്ന അവസ്ഥ ഉണ്ടാകരുത്. ദീപയുടെയും ആശാലതയുടെയും കാര്യത്തിൽ അടിയന്തര നടപടി വേണമെന്നും ഇത്തരം സംഭവങ്ങൾ ആവർത്തിക്കാതിരിക്കാൻ സർക്കാർ ഇടപെടണമെന്നും പിണറായി വിജയൻ ആവശ്യപ്പെട്ടു.
