ഇടുക്കി : വണ്ടിപ്പെരിയാർ മൂങ്കലാർ പൊതുശ്മശാനത്തിൽ സംസ്കാരച്ചടങ്ങിനായി കുഴിയെടുക്കുന്നതിനിടെ കോൺക്രീറ്റ് സ്ലാബ് വീണ് ഒരാൾ മരിച്ചു. മൂങ്കലാർ സ്വദേശി കറുപ്പസ്വാമി (50) ആണ് മരിച്ചത്. ഇന്ന് ഉച്ചയോടെയാണ് സംഭവം. കഴിഞ്ഞ ദിവസം മരിച്ച വ്യാപാരി പൊന്നുസ്വാമിയുടെ മൃതദേഹം അടക്കുന്നതിനായി ബന്ധുക്കളെ അടക്കം ചെയ്ത കല്ലറയ്ക്ക് സമീപം കുഴിയെടുക്കുന്നതിനിടെയാണ് അപകടം.
കറുപ്പസ്വാമിയും അയ്യപ്പനും ചേർന്നാണ് കുഴിയെടുത്തത്. കുഴിക്കുള്ളിൽ നിന്ന് വൃത്തിയാക്കുന്നതിനിടെ തൊട്ടടുത്ത കല്ലറയുടെ ഭാരമേറിയ കോൺക്രീറ്റ് സ്ലാബും ഗ്രാനൈറ്റും ഇളകി കുഴിയിലേക്ക് വീഴുകയായിരുന്നു. കുഴിക്കുള്ളിൽ നിന്നിരുന്ന കറുപ്പസ്വാമിയുടെ മുകളിലേക്കാണ് സ്ലാബ് വീണത്.
ഭാരമേറിയ സ്ലാബിനടിയിൽപ്പെട്ട ഇയാളെ കൂടുതൽ ആളുകളെത്തിയാണ് പുറത്തെടുത്തത്. ഉടൻതന്നെ വണ്ടിപ്പെരിയാർ ആരോഗ്യകേന്ദ്രത്തിൽ എത്തിച്ചെങ്കിലും ജീവൻ രക്ഷിക്കാനായില്ല. മൃതദേഹം ഇടുക്കി മെഡിക്കൽ കോളേജിൽ പോസ്റ്റ്‌മോർട്ടത്തിന് ശേഷം ബന്ധുക്കൾക്ക് വിട്ടുനൽകും.
