പാലക്കാട്: ആലത്തൂരിൽ റോഡരികിലെ ചായക്കടയിലേക്ക് നിയന്ത്രണം വിട്ട് കാർ ഇടിച്ചു കയറി. അപകടത്തിൽ ഗൃഹനാഥന് ദാരുണാന്ത്യം.ആലത്തൂർ തെന്നിലാപുരം കിഴക്കേത്തറ കണ്ണൻ (58) ആണ് ഈ അപകടത്തിൽ മരിച്ചത്. ഇന്ന് രാവിലെ 7:15 നായിരുന്നു സംഭവം. കണ്ണൻ എന്ന വ്യക്തി വെനിലാപുരം കിഴക്കേത്തറ ബസ് കാത്തിരിപ്പ് കേന്ദ്രത്തിന് സമീപം പെട്ടിക്കടയിൽ ചായ കച്ചവടം നടത്തുന്ന ആളാണ്.
ഇന്ന് കാലത്ത് ഇദ്ദേഹം പെട്ടിക്കടയ്ക്ക് മുൻപിൽ നിൽക്കുന്ന സമയത്തായിരുന്നു കാർ ചായക്കടയിലേക്ക് ഇടിച്ചു കയറിയത്.ആലത്തൂർ ഭാഗത്തേക്ക് ആയിരുന്നു കാർ പോയിരുന്നത്. പിന്നീട് കാർ നിയന്ത്രണം വിട്ട് കണ്ണനെ ഇടിച്ചു. ശേഷം പെട്ടിക്കടയും തകർന്നു. ഉടൻ തന്നെ ഓടിക്കൂടിയ നാട്ടുകാർ കണ്ണനെ ഇരട്ടക്കുളത്തെ സ്വകാര്യ ആശുപത്രിയിൽ എത്തിച്ചു.പക്ഷേ ജീവൻ രക്ഷിക്കാൻ കഴിഞ്ഞില്ല. ഡ്രൈവർ ഉറങ്ങി പോയതാണ് അപകട കാരണമെന്നാണ് അനുമാനം.
