കൊല്ല൦:കുടിശിക അടയ്ക്കാൻ ആവശ്യപ്പെട്ടതിലെ വൈരാഗ്യത്തെ തുടർന്ന് ബാങ്ക് ജീവനക്കാരിയെ ആക്രമിച്ച കേസിൽ മുഖത്തല സ്വദേശി സന്ദീപ് ലാൽ അറസ്റ്റിൽ. കൊട്ടിയം പോലീസാണ് ഇയാളെ പിടികൂടിയത്.സംഭവ ദിവസം, തുക അടയ്ക്കണമെന്ന് ആവശ്യപ്പെട്ട് ബാങ്ക് ജീവനക്കാരിയും ഒരു സഹപ്രവർത്തകയും ചേർന്ന് സന്ദീപിന്റെ വീട്ടിലെത്തിയിരുന്നു.
ബാങ്ക് നടപടിക്രമങ്ങളെക്കുറിച്ച് സംസാരിക്കുന്നതിനിടെ സന്ദീപും ഇയാളുടെ സുഹൃത്തും ചേർന്ന് വനിതാ ജീവനക്കാരെ അസഭ്യം പറഞ്ഞു.പ്രകോപിതനായ സന്ദീപിനെ ഭയന്ന് ജീവനക്കാർ ഓട്ടോറിക്ഷയിൽ കയറി തിരികെ പോകാൻ ശ്രമിക്കുന്നതിനിടെ പ്രതി അവരെ തടഞ്ഞു നിർത്തി.
ഈ സമയത്ത് ജീവനക്കാരി യുവാവിൻ്റെ മുഖത്ത് അടിക്കുകയും, ഇതിന് പിന്നാലെ സന്ദീപ് ജീവനക്കാരിയെ ആക്രമിക്കുകയുമായിരുന്നു.ആക്രമണത്തിന് പിന്നിൽ കുടിശിക ആവശ്യപ്പെട്ടതിലുള്ള വൈരാഗ്യമാണെന്ന് പോലീസ് വ്യക്തമാക്കി.
