കോട്ടയം : സംസ്ഥാനത്ത് കാലവർഷക്കെടുതിയും പ്രളയവും നേരിടുന്നതിൽ യുഡിഎഫ് സർക്കാർ പരാജയപ്പെട്ടുവെന്ന് മുൻമന്ത്രി വിഎൻ വാസവൻ. ദുരന്തബാധിത പ്രദേശങ്ങളിൽ ഒരു മുൻകരുതലുകളും സ്വീകരിക്കാൻ അധികൃതർ തയ്യാറായില്ല.
ജില്ലയിൽ ഏറ്റവും കൂടുതൽ മരണങ്ങൾ റിപ്പോർട്ട് ചെയ്തത് കോട്ടയത്താണെന്നും അദ്ദേഹം ചൂണ്ടിക്കാട്ടി. വെള്ളപ്പൊക്കത്തിൽ ഈരാറ്റുപേട്ട പൂർണമായും മുങ്ങി. വീടുകളും വീട്ടുപകരണങ്ങളും ഒലിച്ചു പോയി. പടിഞ്ഞാറൻ മേഖലയും പൂർണമായി വെള്ളത്തിനടിയിലാണ്.
തണ്ണീർമുക്കം ബണ്ട് വൃത്തിയാക്കാത്തതിനാലാണ് പടിഞ്ഞാറൻ മേഖലകളിൽ നിന്ന് വെള്ളം ഇറങ്ങാത്ത അവസ്ഥയുണ്ടായത്. പ്രളയബാധിത പ്രദേശങ്ങളിൽ ആംബുലൻസ് സൗകര്യം ഏർപ്പെടുത്തിയില്ല. കൃത്യസമയത്ത് ചികിത്സ ലഭിക്കാതെയാണ് കുമരകം സ്വദേശി മരിച്ചതെന്ന് വാസവൻ ആരോപിച്ചു.
പ്രളയ മേഖലകളിൽ കെഎസ്ഇബി ഫ്യൂസ് ഊരിയ നടപടി പ്രതിഷേധാർഹമാണ്. ക്യാൻസർ രോഗിയുടെ വീട്ടിലെ വൈദ്യുതി ബന്ധം വിച്ഛേദിച്ചത് അങ്ങേയറ്റം അനുകമ്പയില്ലാത്ത നടപടിയാണെന്നും വി എൻ വാസവൻ പറഞ്ഞു. നാട്ടിൽ പ്രളയമുണ്ടാകുമ്പോൾ എംഎൽഎ വിദേശത്ത് പോകാൻ പാടില്ലായിരുന്നു.
ദുരന്തമുഖത്ത് പ്രവർത്തനങ്ങൾ ഏകോപിപ്പിക്കേണ്ട പൂഞ്ഞാർ എംഎൽഎ സെബാസ്റ്റ്യൻ എംജെ അമേരിക്കയിലേക്ക് ടൂറിന് പോയത് ജനങ്ങളോടുള്ള അനാദരവാണ്. ദുരന്തസമയത്ത് എംഎൽഎയുടെ സാന്നിധ്യം മണ്ഡലത്തിലുണ്ടായില്ലെന്നും വി എൻ വാസവൻ കൂട്ടിച്ചേർത്തു.
