മസ്കറ്റ് : പ്രവാചകൻ മുഹമ്മദ് നബിയുടെ ജന്മദിനമായ നബിദിനം പ്രമാണിച്ച് ഒമാനിൽ ഓഗസ്റ്റ് 27 വ്യാഴാഴ്ച പൊതുഅവധിയായിരിക്കും. മന്ത്രിസഭ യോഗത്തിലാണ് അവധി സംബന്ധിച്ച തീരുമാനത്തിന് അംഗീകാരം നൽകിയത്.
വ്യാഴാഴ്ചത്തെ പൊതുഅവധിയോടൊപ്പം വെള്ളി, ശനി ദിവസങ്ങളിലെ വാരാന്ത്യ വിശ്രമം കൂടി ലഭിക്കുന്നതോടെ രാജ്യത്തെ ജീവനക്കാർക്ക് തുടർച്ചയായ മൂന്ന് ദിവസത്തെ നീണ്ട വാരാന്ത്യ അവധി ആസ്വദിക്കാനാകും.
ഭരണനിർവ്വഹണ കാര്യക്ഷമത വർദ്ധിപ്പിക്കുന്നതിനായി ഓരോ വർഷത്തിന്റെയും തുടക്കത്തിൽ തന്നെ ദേശീയ-മതപരമായ പൊതു അവധികൾ പ്രഖ്യാപിക്കുന്ന നയമാണ് ഒമാൻ മന്ത്രിസഭ നടപ്പിലാക്കി വരുന്നത്.
ഈ നയം വഴി സർക്കാർ സ്ഥാപനങ്ങൾക്കും സ്വകാര്യ കമ്പനികൾക്കും തങ്ങളുടെ ജോലി ക്രമീകരണങ്ങളും യോഗങ്ങളും മുൻകൂട്ടി ആസൂത്രണം ചെയ്യാൻ സാധിക്കുമെന്ന് ഒമാൻ തൊഴിൽ മന്ത്രാലയം വ്യക്തമാക്കി.
