മലപ്പുറം: കാളികാവ് മേഖലയിൽ കഴിഞ്ഞ 53 ദിവസമായി ജനങ്ങളെ ഭീതിയിലാഴ്ത്തിയ നരഭോജി കടുവയെ ഒടുവിൽ വനംവകുപ്പ് പിടികൂടി. കഴിഞ്ഞ ദിവസങ്ങളിലായി കാളികാവിനും പരിസരപ്രദേശങ്ങളിലും കടുവയുടെ ആക്രമണത്തിൽ നിരവധി വളർത്തുമൃഗങ്ങൾക്കും മനുഷ്യർക്കും ജീവൻ നഷ്ടപ്പെട്ടിരുന്നു.
ഇത് പ്രദേശവാസികൾക്കിടയിൽ വലിയ ആശങ്കയും ഭീതിയും സൃഷ്ടിച്ചിരുന്നു.കടുവയെ പിടികൂടുന്നതിനായി വനംവകുപ്പ് വിപുലമായ ദൗത്യമാണ് നടത്തിയത്. നൂറോളം ഉദ്യോഗസ്ഥരും വിദഗ്ധരും ഉൾപ്പെട്ട സംഘം ദിവസങ്ങളോളം രാവും പകലും തിരച്ചിൽ നടത്തി.
ഡ്രോണുകൾ, സിസിടിവി ക്യാമറകൾ, കെണികൾ തുടങ്ങിയ ആധുനിക സംവിധാനങ്ങളും കടുവയെ കണ്ടെത്താൻ ഉപയോഗിച്ചു. ഈ അടുത്ത കാലത്ത് നടന്ന ഏറ്റവും വലിയ കടുവ ദൗത്യങ്ങളിലൊന്നാണിത്.ഇന്ന് രാവിലെയാണ് കടുവ കെണിയിലായത്.
കെണിയിലായ കടുവയെ വിദഗ്ധ പരിശോധനകൾക്കും തുടർ ചികിത്സയ്ക്കുമായി വനംവകുപ്പ് പ്രത്യേക കേന്ദ്രത്തിലേക്ക് മാറ്റി. കടുവയെ പിടികൂടിയതോടെ കാളികാവ് നിവാസികൾക്ക് വലിയ ആശ്വാസമായി.
