ഡെറാഡൂൺ : ഉത്തരാഖണ്ഡിലെ വിവിധ ജില്ലകളിൽ കാലാവസ്ഥാ വകുപ്പ് ഓറഞ്ച് അലർട്ട് പ്രഖ്യാപിച്ച സാഹചര്യത്തിൽ ചാർ ധാം തീർത്ഥാടകർക്ക് ഗർവാൾ കമ്മീഷണർ വിനയ് ശങ്കർ പാണ്ഡെ ജാഗ്രതാ നിർദ്ദേശം നൽകി. ഉത്തർകാശി, തെഹ്രി, ഗർവാൾ മേഖലകളിൽ ഇടിമിന്നലോടുകൂടിയ കനത്ത മഴയ്ക്ക് സാധ്യതയുള്ളതിനാൽ യാത്രക്കാർ അതീവ ശ്രദ്ധ പുലർത്തണമെന്ന് അദ്ദേഹം അഭ്യർത്ഥിച്ചു.
മെയ് 12, 13 തീയതികളിൽ യാത്ര ചെയ്യുന്നവർ കാലാവസ്ഥാ സാഹചര്യം വിലയിരുത്തി മാത്രം മുന്നോട്ട് പോകണം. മോശം കാലാവസ്ഥയുള്ളപ്പോൾ യാത്ര ഒഴിവാക്കുന്നതാണ് ഉചിതമെന്നും സാഹചര്യം മെച്ചപ്പെട്ട ശേഷം തീർത്ഥാടനം തുടരുന്നതാണ് സുരക്ഷിതമെന്നും കമ്മീഷണർ വ്യക്തമാക്കി. പ്രാദേശിക അധികാരികളും ഭരണകൂടവും നൽകുന്ന നിർദ്ദേശങ്ങൾ കർശനമായി പാലിക്കണമെന്നും അദ്ദേഹം കൂട്ടിച്ചേർത്തു.
മഴ മുന്നറിയിപ്പ് നിലനിൽക്കുന്നുണ്ടെങ്കിലും ചാർ ധാം യാത്ര സുഗമമായി തുടരുന്നുണ്ടെന്ന് അധികൃതർ അറിയിച്ചു. തീർത്ഥാടകരുടെ സുരക്ഷ ഉറപ്പാക്കാൻ സംസ്ഥാന സർക്കാർ വിപുലമായ സജ്ജീകരണങ്ങളാണ് ഒരുക്കിയിരിക്കുന്നത്. യാത്രാ റൂട്ടുകളിലും പ്രധാന തീർത്ഥാടന, വിനോദസഞ്ചാര കേന്ദ്രങ്ങളിലും കുടിവെള്ളം, ടോയ്ലറ്റുകൾ, ആരോഗ്യ സേവനങ്ങൾ, ശുചിത്വം, പാർക്കിംഗ്, ഗതാഗത നിയന്ത്രണം തുടങ്ങിയ സൗകര്യങ്ങൾ ശക്തിപ്പെടുത്തി.
തീർത്ഥാടകർക്കും വിനോദസഞ്ചാരികൾക്കും അസൗകര്യങ്ങൾ ഉണ്ടാകാതിരിക്കാൻ മുഴുവൻ സമയവും ഉദ്യോഗസ്ഥർ പ്രവർത്തനരംഗത്തുണ്ടാകുമെന്നും സർക്കാർ അറിയിച്ചു.
