റോം: വ്യാജ ബോംബ് ഭീഷണി സന്ദേശങ്ങൾ ലഭിച്ചതിനെ തുടർന്ന് ഇറ്റലിയിലുടനീളം മുന്നൂറിലധികം സ്കൂളുകൾ അടിയന്തരമായി ഒഴിപ്പിച്ചു. ഇമെയിൽ വഴിയാണ് സ്‌കൂളുകളിൽ സ്ഫോടകവസ്തുക്കൾ വെച്ചിട്ടുണ്ടെന്ന ഭീഷണി സന്ദേശം എത്തിയത്. തുടർന്ന് സുരക്ഷ മുൻനിർത്തി വിദ്യാർഥികളെയും അധ്യാപകരെയും ഉടൻതന്നെ സുരക്ഷിത സ്ഥാനങ്ങളിലേക്ക് മാറ്റുകയായിരുന്നു.
ഇറ്റലിക്ക് പുറമെ അയർലൻഡ്, സ്കോട്ട്‌ലൻഡ്, വടക്കൻ അയർലൻഡ് എന്നിവിടങ്ങളിലെ വിവിധ സ്കൂളുകളിലും സമാനമായ ഭീഷണി സന്ദേശങ്ങൾ ലഭിച്ചതായി റിപ്പോർട്ടുകളുണ്ട്. എന്നാൽ ഈ രാജ്യങ്ങളിൽ സ്കൂളുകൾ ഒഴിപ്പിച്ചതായി ഔദ്യോഗിക വിവരങ്ങൾ ലഭ്യമല്ല.
പരിഭ്രാന്തി സൃഷ്ടിക്കാനുള്ള ശ്രമം: ജോർജിയ മെലോണി
സ്‌കൂളുകൾക്ക് നിലവിൽ പ്രകടമായ യാതൊരു അപകടസാധ്യതയുമില്ലെന്ന് ഇറ്റാലിയൻ പ്രധാനമന്ത്രി ജോർജിയ മെലോണി വ്യക്തമാക്കി. ജനങ്ങൾക്കിടയിൽ അനാവശ്യ ആശങ്കയും പരിഭ്രാന്തിയും സൃഷ്ടിക്കുക മാത്രമാണ് ഭീഷണിക്ക് പിന്നിലെ ലക്ഷ്യമെന്നും സംഭവത്തിൽ സമഗ്രമായ അന്വേഷണം പുരോഗമിക്കുകയാണെന്നും അവർ അറിയിച്ചു. സ്ഥിതിഗതികൾ വിലയിരുത്തുന്നതിനായി പ്രധാനമന്ത്രിയുടെ നേതൃത്വത്തിൽ ഉന്നതതല മന്ത്രിസഭാ യോഗവും ചേർന്നു.
സ്കൂളുകളിലേക്ക് സന്ദേശം അയച്ച അതേ അജ്ഞാത ഇമെയിൽ വഴി പ്രധാനമന്ത്രി ജോർജിയ മെലോണിക്കും വധഭീഷണി ലഭിച്ചിട്ടുണ്ടെന്ന് ഇറ്റാലിയൻ മാധ്യമങ്ങൾ റിപ്പോർട്ട് ചെയ്യുന്നു. എങ്കിലും തനിക്കെതിരെയുള്ള വ്യക്തിപരമായ ഭീഷണിയെക്കുറിച്ച് പ്രധാനമന്ത്രി ഇതുവരെ പരസ്യമായി പ്രതികരിച്ചിട്ടില്ല.
