കേരള മുഖ്യമന്ത്രിയെ നിശ്ചയിക്കുന്ന കാര്യത്തിൽ ഒൻപതാം ദിവസവും കോൺഗ്രസ് ഹൈക്കമാൻഡിൽ അനിശ്ചിതത്വം തുടരുന്നു. അന്തിമ തീരുമാനമെടുക്കുന്നതിലെ കാലതാമസം പാർട്ടിയുടെ പ്രതിച്ഛായയെ ബാധിച്ചുവെന്ന് കെ.പി.സി.സി അധ്യക്ഷൻ സണ്ണി ജോസഫ് ഡൽഹിയിൽ മാധ്യമങ്ങളോട് പറഞ്ഞു.
എന്നിരുന്നാലും, ചർച്ചകൾ പുരോഗമിക്കുകയാണെന്നും ഉടൻ തന്നെ ശുഭവാർത്ത ഉണ്ടാകുമെന്നും അദ്ദേഹം പ്രത്യാശ പ്രകടിപ്പിച്ചു.മുഖ്യമന്ത്രിയെ സംബന്ധിച്ച അന്തിമ പ്രഖ്യാപനം ഇന്നുണ്ടായേക്കുമെന്നാണ് സൂചന. നിർണ്ണായക തീരുമാനമെടുക്കുന്നതിനായി കോൺഗ്രസ് അധ്യക്ഷൻ മല്ലികാർജുൻ ഖർഗെ ഇന്ന് വൈകുന്നേരം അഞ്ചുമണിയോടെ പ്രത്യേക ചാർട്ടേഡ് വിമാനത്തിൽ ഡൽഹിയിലെത്തും.
തുടർന്ന് അദ്ദേഹം ലോക്സഭാ പ്രതിപക്ഷ നേതാവ് രാഹുൽ ഗാന്ധിയുമായി കൂടിക്കാഴ്ച നടത്തും. ഈ കൂടിക്കാഴ്ചയ്ക്ക് ശേഷമാകും ഔദ്യോഗിക പ്രഖ്യാപനം ഉണ്ടാവുക.മുഖ്യമന്ത്രിയെ നിശ്ചയിക്കുന്നത് വൈകുന്നത് പാർട്ടിയുടെ പ്രതിച്ഛായയ്ക്ക് മങ്ങലേൽപ്പിച്ചു.സോണിയ ഗാന്ധിയുടെ വസതിയിൽ ചർച്ചകൾ ആരംഭിച്ചിട്ടുണ്ട്.മുഖ്യമന്ത്രിയുടെ കാര്യത്തിൽ തീരുമാനമായ ശേഷമാകും മന്ത്രിസഭാ രൂപീകരണത്തെക്കുറിച്ച് ചർച്ച ചെയ്യുക.
സോണിയ ഗാന്ധിയുടെ വസതിയിൽ മുതിർന്ന നേതാക്കളുടെ സാന്നിധ്യത്തിൽ ചർച്ചകൾ തുടരുകയാണ്. കേരളത്തിലെ ഭരണം സുഗമമായി മുന്നോട്ട് കൊണ്ടുപോകാൻ ആരെ തിരഞ്ഞെടുക്കണമെന്ന കാര്യത്തിൽ വൻ സസ്പെൻസ് തന്നെയാണ് ഹൈക്കമാൻഡ് നിലനിർത്തുന്നത്. വൈകുന്നേരത്തോടെ കേരളത്തിന്റെ പുതിയ മുഖ്യമന്ത്രി ആരെന്ന കാര്യത്തിൽ വ്യക്തമായ ചിത്രം ലഭിക്കുമെന്ന പ്രതീക്ഷയിലാണ് പ്രവർത്തകർ.
