തിരുവനന്തപുരം: നിയമസഭാ തിരഞ്ഞെടുപ്പിലെ യുഡിഎഫ് വിജയത്തിന് പിന്നാലെ കേരളത്തിന്റെ അടുത്ത മുഖ്യമന്ത്രിയെ കണ്ടെത്താനുള്ള ശ്രമങ്ങളിൽ കോൺഗ്രസിനുള്ളിൽ അനിശ്ചിതത്വം തുടരുന്നു. സംസ്ഥാന കോൺഗ്രസിലെ ഗ്രൂപ്പ് പോരുകൾ പൂർണ്ണമായും കെട്ടടങ്ങിയ ശേഷം മാത്രം മതി ഔദ്യോഗിക പ്രഖ്യാപനമെന്ന കർശന നിലപാടിലാണ് എഐസിസി നേതൃത്വം.മുഖ്യമന്ത്രി പദത്തിനായി മത്സരരംഗത്തുള്ള വി.ഡി. സതീശൻ, കെ.സി. വേണുഗോപാൽ, രമേശ് ചെന്നിത്തല എന്നീ മൂന്ന് പ്രമുഖ നേതാക്കളും തങ്ങളുടെ അവകാശവാദങ്ങളിൽ നിന്ന് പിന്നോട്ടുപോയിട്ടില്ല.
നിലവിലെ സാഹചര്യത്തിൽ പാർട്ടിയിൽ അച്ചടക്ക ലംഘനങ്ങൾ നടക്കുന്നുണ്ടോ എന്ന് ഹൈക്കമാൻഡ് പ്രതിനിധികൾ സൂക്ഷ്മമായി നിരീക്ഷിച്ചുവരികയാണ്. പരസ്യമായ പ്രസ്താവനകളും പോസ്റ്റർ യുദ്ധങ്ങളും ഒഴിവാക്കണമെന്ന് നേരത്തെ തന്നെ നിർദ്ദേശം നൽകിയിരുന്നു.ദേശീയ നേതൃത്വവുമായുള്ള അടുപ്പവും ഭൂരിഭാഗം എംഎൽഎമാരുടെ പിന്തുണയും കെ.സി. വേണുഗോപാലിനെ തുണയ്ക്കുമെന്നാണ് ഇവരുടെ കണക്കുകൂട്ടൽ.ഹൈക്കമാൻഡ് കൂടുതൽ സമയമെടുക്കുന്നത് ഒരു ‘കൺസെൻസസ്’ (സമവായം) സ്ഥാനാർത്ഥിയിലേക്ക് എത്താനാണെന്നും, അത് തങ്ങൾക്ക് അനുകൂലമാകുമെന്നും സതീശൻ-ചെന്നിത്തല പക്ഷങ്ങൾ വിശ്വസിക്കുന്നു.
ഡൽഹിയിലെ നിർണ്ണായക ചർച്ചകൾക്ക് ശേഷം തിരിച്ചെത്തിയ രമേശ് ചെന്നിത്തല തിരുവനന്തപുരം വിമാനത്താവളത്തിൽ മാധ്യമങ്ങളോട് സംസാരിച്ചു.”മുഖ്യമന്ത്രിയെ തീരുമാനിക്കുന്നതുമായി ബന്ധപ്പെട്ട എല്ലാ ചർച്ചകളും ഹൈക്കമാൻഡുമായി പൂർത്തിയാക്കി. പാർട്ടിയുടെ ഉചിതമായ തീരുമാനം ഉടൻ ഉണ്ടാകും. ഹൈക്കമാൻഡ് കൈക്കൊള്ളുന്ന ഏത് തീരുമാനവും എല്ലാവരും ഒരേ മനസ്സോടെ അംഗീകരിക്കും,” അദ്ദേഹം വ്യക്തമാക്കി.മുഖ്യമന്ത്രിയെ സംബന്ധിച്ച അന്തിമ പ്രഖ്യാപനം അടുത്ത 24 മുതൽ 48 മണിക്കൂറിനുള്ളിൽ ഉണ്ടാകുമെന്നാണ് സൂചന
