ന്യൂഡൽഹി: രണ്ടാഴ്ചത്തെ ഇടവേളയ്ക്ക് ശേഷം രാജ്യത്ത് തെക്കുപടിഞ്ഞാറൻ കാലവർഷം (എടവപ്പാതി) വീണ്ടും ശക്തമാകുന്നു. വരും ആഴ്ചയിൽ രാജ്യത്ത് ഏറ്റവും കൂടുതൽ മഴ ലഭിക്കുക ദക്ഷിണേന്ത്യൻ സംസ്ഥാനങ്ങളിലായിരിക്കുമെന്ന് ഇന്ത്യൻ കാലാവസ്ഥാ വകുപ്പ് (IMD) അറിയിച്ചു. മധ്യ ഇന്ത്യയിലും മഴമേഘങ്ങൾ ശക്തിപ്രാപിക്കുന്നത് കനത്ത ചൂടിന് വലിയ ആശ്വാസമാകും.
ജൂൺ മാസത്തിൽ മഴ വൈകിയത് കാർഷിക മേഖലയിൽ വലിയ ആശങ്കയുണ്ടാക്കിയിരുന്നുവെങ്കിലും കാലവർഷം തിരിച്ചെത്തുന്നത് കർഷകർക്ക് പ്രതീക്ഷയേകും.കേരളവും മാഹിയും: ജൂൺ 19 മുതൽ 23 വരെ വ്യാപകമായ ശക്തമായ മഴയ്ക്ക് സാധ്യത.കർണാടക തീരദേശ കർണാടകയിൽ ജൂൺ 21 മുതൽ 25 വരെയും, ഉൾനാടൻ കർണാടകയിൽ ജൂൺ 22, 23 തീയതികളിലും കനത്ത മഴ ലഭിക്കും.തമിഴ്നാട്, പുതുച്ചേരി, കാരയ്ക്കൽ ജൂൺ 19 മുതൽ 21 വരെ ഒറ്റപ്പെട്ട ശക്തമായ മഴയ്ക്ക് സാധ്യത.
ലക്ഷദ്വീപ് ജൂൺ 21-ന് ശക്തമായ മഴ മുന്നറിയിപ്പുണ്ട്.വടക്കൻ-മധ്യ ഇന്ത്യയിലെ പല ഭാഗങ്ങളിലും വ്യാപകമായ കനത്ത മഴ ഇനിയും ആരംഭിച്ചിട്ടില്ലെങ്കിലും അന്തരീക്ഷം മേഘാവൃതമാകുന്നതും ഇടിമിന്നലും കാലവർഷം സജീവമാകുന്നതിന്റെ സൂചനയാണ് നൽകുന്നത്.മധ്യപ്രദേശ്, ഛത്തീസ്ഗഡ്, വിദർഭ ജൂൺ 19 മുതൽ 25 വരെയുള്ള ദിവസങ്ങളിൽ ഈ മേഖലകളിൽ പരക്കെ മഴ ലഭിക്കും.
കാറ്റ് മുന്നറിയിപ്പ് പടിഞ്ഞാറൻ മധ്യപ്രദേശിൽ ജൂൺ 19, 20 തീയതികളിൽ മണിക്കൂറിൽ 50 മുതൽ 70 കിലോമീറ്റർ വരെ വേഗതയിൽ അതിശക്തമായ കാറ്റുവീശാൻ സാധ്യതയുള്ളതിനാൽ ജാഗ്രതാ നിർദ്ദേശം നൽകിയിട്ടുണ്ട്. ഈ പ്രദേശങ്ങളിൽ ജൂൺ 23 വരെ ശക്തമായ ഇടിമിന്നലോടു കൂടിയ മഴയും തുടരും.
