കൊച്ചി : പ്രസിദ്ധ നടന്മാർക്കെതിരെ പീഡന ആരോപണവുമായി നടി മിനു മുനിർ. മുകേഷ്, മണിയൻപിള്ള രാജു, ഇടവേള ബാബു, ജയസൂര്യ എന്നിവർക്കെതിരെയാണ് നടി ആരോപണമുന്നയിച്ചിരിക്കുന്നത്. അഡ്വ.ചന്ദ്രശേഖരൻ, പ്രൊഡക്ഷൻ കൺട്രോളർ നോബിൾ, വിച്ചു തുടങ്ങിയവർക്കെതിരെയും ആരോപണം ഉന്നയിച്ചിട്ടുണ്ട്. ശാരീരികമായും മാനസികമായും ഉപദ്രവിച്ചുവെന്നാണ് മിനു പറയുന്നത്. 2013ലാണ് ദുരനുഭവം ഉണ്ടായത് എന്ന് മിനു പറയുന്നു. അഡ്ജസ്റ്റ്മെന്റിന് തയാറാകാഞ്ഞതിനാൽ മലയാള സിനിമ മേഖല ഉപേക്ഷിക്കേണ്ടി വന്നു. മോശമായി ആദ്യം പെരുമാറിയത് ജയസൂര്യ ആണെന്നും നടി പറയുന്നു. സിനിമ സെറ്റിൽ വെച്ച് ജയസൂര്യ കടന്നു പിടിച്ചിരുന്നുവെന്നും മുകേഷ് അശ്ലീല ചുവയോടെ സംസാരിച്ചെന്നും നടി ആരോപിക്കുന്നു.
തന്റെ ഫേസ് ബുക്ക് പേജിലൂടെയാണ് നടി ആരോപണമുന്നയിച്ചിരിക്കുന്നത്. സിനിമയിൽ തുടരാൻ ആഗ്രഹമുണ്ടായിരുന്നു, എന്നാൽ ഉപദ്രവം അസഹനീയമായതോടെ മലയാള സിനിമ ഉപേക്ഷിച്ച് ചെന്നൈയിലേക്ക് താമസം മാറ്റാൻ താൻ നിർബന്ധിതയാവുകയായിരുന്നു എന്നും മിനു പറയുന്നു. കേരളകൗമുദിയിൽ പ്രസിദ്ധീകരിച്ച ഒരു ലേഖനത്തിൽ ആക്ഷേപത്തിനെതിരെ താൻ സംസാരിച്ചിരുന്നുവെന്നും ഫേസ്ബുക്കിൽ കുറിച്ചിട്ടുണ്ട്. താൻ അനുഭവിച്ച മാനസികാഘാതത്തിനും വിഷമങ്ങൾക്കും ഉത്തരവാദിയായവർക്കെതിരെ നടപടി സ്വീകരിക്കണമെന്നും മിനു ആവശ്യപ്പെടുന്നു.
