കാഠ്മണ്ഡു : നേപ്പാളിൽ കനത്ത നാശം വിതച്ച മിന്നൽ പ്രളയത്തിൽ മരിച്ചവരുടെ എണ്ണം 950 കടന്നു. വിവിധ ജലവൈദ്യുത പദ്ധതികളുടെ തുരങ്കങ്ങളിലടക്കം 650ഓളം തൊഴിലാളികളെക്കുറിച്ച് ഇതുവരെയും വിവരമൊന്നുമില്ല. ദുരന്തത്തിൽപ്പെട്ട ഇന്ത്യക്കാരെ കണ്ടെത്തുന്നതിനായി തെരച്ചിൽ തുടരുകയാണെങ്കിലും പുതിയ വിവരങ്ങളൊന്നും ലഭ്യമായിട്ടില്ല.
റോഡ് ഗതാഗതം വിച്ഛേദിക്കപ്പെട്ടതും രക്ഷാപ്രവർത്തനം ദുഷ്കരവുമായ പ്രദേശങ്ങളിലേക്ക് ഹെലികോപ്റ്ററുകൾ വഴി രക്ഷാ സംഘങ്ങളെ എത്തിക്കാനുള്ള ശ്രമങ്ങൾ തുടരുകയാണ്. 111 മെഗാവാട്ട് ശേഷിയുള്ള റസുവഗഢി ഹൈഡ്രോപവർ പ്രോജക്റ്റിന്റെ തുരങ്കത്തിന്റെ അവസാന അറ്റം വരെ തെർമൽ ഡ്രോണുകൾ ഉപയോഗിച്ച് രക്ഷാപ്രവർത്തകർ മിന്നൽ പരിശോധന നടത്തി.
93 തൊഴിലാളികളെങ്കിലും ഇവിടെ കുടുങ്ങിക്കിടപ്പുണ്ടെന്ന് കരുതിയെങ്കിലും ജീവന്റെ ലക്ഷണങ്ങളൊന്നും കണ്ടെത്താനായില്ല. പ്രളയം ഉണ്ടാകുന്ന സമയത്ത് പ്രദേശത്തെ വിവിധ ജലവൈദ്യുത പദ്ധതികളുടെ ഭൂഗർഭ തുരങ്കങ്ങളിൽ നൂറുകണക്കിന് തൊഴിലാളികളാണ് ജോലി ചെയ്തിരുന്നത്.
കാണാതായ തൊഴിലാളികൾ തുരങ്കത്തിനുള്ളിൽ ചെളിയിൽ കുടുങ്ങിയതാണോ അതോ വെള്ളപ്പൊക്കം കണ്ട നിമിഷം ഉയർന്ന പ്രദേശങ്ങളിലേക്ക് ഓടി രക്ഷപ്പെട്ടതാണോ അതോ പ്രളയജലത്തിൽ ഒഴുകിപ്പോയതാണോ എന്ന് തിരിച്ചറിയാൻ സാധിക്കാത്തത് രക്ഷാപ്രവർത്തകർക്ക് വലിയ വെല്ലുവിളിയാകുന്നുണ്ട്.
