തിരുവനന്തപുരം: ആരോഗ്യവകുപ്പിന് കീഴിലുള്ള സിമെറ്റിൽ (CIMET) ബി.ജെ.പി നേതാവിനെ സീനിയർ സൂപ്രണ്ടായി നിയമിച്ചത് വിവാദമായതോടെ ഉദ്യോഗസ്ഥനെ പിരിച്ചുവിടാൻ ആരോഗ്യമന്ത്രി നിർദേശം നൽകി. ബി.ജെ.പി പെൻഷനേഴ്‌സ് സെൽ കൺവീനറും എൻ.ജി.ഒ സംഘ് മുൻ സംസ്ഥാന കമ്മിറ്റി അംഗവുമായ രതീഷ് ആർ. നായർക്കെതിരെയാണ് നടപടി.
സർക്കാർ സർവീസിൽ നിന്ന് വിരമിച്ച രതീഷ് ആർ. നായരെ സിമെറ്റിൽ സീനിയർ സൂപ്രണ്ടായി നിയമിച്ച നടപടിയാണ് വിവാദത്തിലായത്. സംഭവം ശ്രദ്ധയിൽപ്പെട്ടതോടെയാണ് രതീഷിനെ പിരിച്ചുവിടാൻ നിർദേശം നൽകിയതെന്ന് ആരോഗ്യമന്ത്രി വ്യക്തമാക്കി. “സാധാരണ ഇത്തരത്തിലുള്ള നിയമനങ്ങളിൽ മന്ത്രിമാർ ഇടപെടാറില്ല. ഉദ്യോഗസ്ഥ തലത്തിലാണ് ഇൻ്റർവ്യൂ അടക്കമുള്ള കാര്യങ്ങൾ നടക്കുന്നത്. ആരോഗ്യമന്ത്രാലയം നേരിട്ട് നടത്തുന്ന നിയമനമല്ല ഇത്.
എന്നാൽ രതീഷ് ആർ. നായരുടെ മുൻകാല റെക്കോർഡുകൾ പരിശോധിക്കുമ്പോൾ ഇത്തരം ഒരു പദവിയിലിരിക്കാൻ അദ്ദേഹം യോഗ്യനല്ലെന്ന് വ്യക്തമാണ്.”ആരെയും രാഷ്ട്രീയം നോക്കിയല്ല നിയമിക്കുന്നതെന്നും, ഇത്തരം നിയമനങ്ങൾ നടത്താൻ മന്ത്രി വിചാരിച്ചാൽ സാധിക്കുമെങ്കിലും സംഭവത്തിൽ ആവശ്യമായ നിയമപരമായ തുടർനടപടികൾ സ്വീകരിക്കാൻ ഉദ്യോഗസ്ഥർക്ക് നിർദേശം നൽകിയിട്ടുണ്ടെന്നും മന്ത്രി കൂട്ടിച്ചേർത്തു.
