
കൊച്ചി: സംസ്ഥാനത്ത് സ്വർണവിലയിൽ വീണ്ടും ഇടിവ്. ഇന്ന് 22 കാരറ്റ് സ്വർണത്തിന് ഗ്രാമിന് 70 രൂപയും പവന് 560 രൂപയുമാണ് കുറഞ്ഞത്. ഇതോടെ ഒരു പവൻ സ്വർണത്തിന്റെ വിപണിവില 99,760 രൂപയായി. ഗ്രാമിന് 12,470 രൂപയാണ് ഇന്നത്തെ നിരക്ക്. ഏഴുമാസത്തെ ഇടവേളയ്ക്ക് ശേഷമാണ് സംസ്ഥാനത്ത് സ്വർണവില ഒരു ലക്ഷം രൂപയ്ക്ക് താഴെയെത്തുന്നത്.
ഇന്നലെ ഒരു പവൻ സ്വർണത്തിന് 1,00,320 രൂപയും ഗ്രാമിന് 12,540 രൂപയുമായിരുന്നു വില.
തുടർച്ചയായ ദിവസങ്ങളിലെ ഈ വിലയിടിവ് വിവാഹാവശ്യങ്ങൾക്കും മറ്റുമായി സ്വർണം വാങ്ങാൻ കാത്തിരിക്കുന്ന സാധാരണക്കാർക്ക് വലിയ ആശ്വാസമാണ് നൽകുന്നത്.അന്താരാഷ്ട്ര വിപണിയിലെ വിലവ്യതിയാനങ്ങളും അമേരിക്കൻ ഡോളറിന്റെ മൂല്യവർധനവും ആഗോള സാമ്പത്തിക സാഹചര്യങ്ങളുമാണ് ആഭ്യന്തര വിപണിയിലെ സ്വർണവിലയെ പ്രധാനമായും സ്വാധീനിക്കുന്നത്.
കഴിഞ്ഞ കുറച്ചു ദിവസങ്ങളായി സ്വർണവിലയിൽ പ്രകടമായ ചാഞ്ചാട്ടമാണ് വിപണിയിൽ ദൃശ്യമാകുന്നത്.അതേസമയം, സ്വർണാഭരണങ്ങൾ വാങ്ങുമ്പോൾ വിപണിവിലയ്ക്ക് പുറമേ പണിക്കൂലിയും ജിഎസ്ടിയും (GST) നൽകേണ്ടതിനാൽ ഉപഭോക്താക്കൾ നൽകേണ്ട അന്തിമവില ഇതിലും ഉയർന്നതായിരിക്കും. അന്താരാഷ്ട്ര വിപണിയിലെ ചലനങ്ങൾക്കനുസരിച്ച് വരും ദിവസങ്ങളിലും സ്വർണവിലയിൽ മാറ്റങ്ങളുണ്ടാകാനാണ് സാധ്യതയെന്ന് വിപണി വിദഗ്ധർ വിലയിരുത്തുന്നു.