ദില്ലി : ദില്ലിയിൽ വായു മലിനീകരണം അതീവ ഗുരുതരമായ സാഹചര്യത്തിലേക്ക് ഉയർന്നതിനെ തുടർന്ന് എൻസിആർ മേഖലയിൽ കർശന നിയന്ത്രണങ്ങൾ ഏർപ്പെടുത്തി. മലിനീകരണ തോത് നിയന്ത്രിക്കുന്നതിന്റെ ഭാഗമായി നിർമ്മാണ-പൊളിക്കൽ പ്രവർത്തനങ്ങൾക്ക് നിരോധനം ഏർപ്പെടുത്തി.
സ്കൂളുകൾ ഓൺലൈൻ ക്ലാസുകളിലേക്ക് മാറ്റുകയും ചെയ്തിട്ടുണ്ട്. അയൽ സംസ്ഥാനങ്ങളിലെ വൈക്കോൽ കത്തിക്കലും പ്രതികൂല കാലാവസ്ഥയുമാണ് ദില്ലിയിലെ അന്തരീക്ഷ സ്ഥിതി വഷളാക്കിയതെന്നാണ് വിലയിരുത്തൽ.
മേഖലയിൽ വിഷപ്പുകമഞ്ഞ് ശക്തമായി തുടരുന്ന സാഹചര്യത്തിൽ ജനങ്ങൾ അത്യാവശ്യത്തിനല്ലാതെ പുറത്തിറങ്ങരുതെന്നും പുറത്തിറങ്ങുമ്പോൾ നിർബന്ധമായും എൻ95 മാസ്കുകൾ ധരിക്കണമെന്നും ആരോഗ്യവകുപ്പ് കർശന ജാഗ്രതാ നിർദ്ദേശം നൽകിയിട്ടുണ്ട്.
