ദില്ലി : കൊൽക്കത്തയിലെ ദുർഗാ പൂജ പന്തലിലുണ്ടായ തിക്കിലും തിരക്കിലും പെട്ട് 17 പേർ മരിച്ച സംഭവത്തിൽ അനുശോചനം രേഖപ്പെടുത്തി പ്രധാനമന്ത്രി നരേന്ദ്ര മോദിയും കേന്ദ്ര ആഭ്യന്തര മന്ത്രി അമിത് ഷായും. അപകടത്തിൽ ജീവൻ നഷ്ടപ്പെട്ടവരുടെ കുടുംബങ്ങൾക്ക് പ്രധാനമന്ത്രി ധനസഹായം പ്രഖ്യാപിച്ചു.
മരിച്ചവരുടെ കുടുംബങ്ങൾക്ക് രണ്ട് ലക്ഷം രൂപ വീതവും പരിക്കേറ്റവർക്ക് 50000 രൂപ വീതവും പ്രധാനമന്ത്രിയുടെ ദേശീയ ദുരിതാശ്വാസ നിധിയിൽ നിന്ന് നൽകുമെന്ന് അറിയിച്ചു. അപകടത്തെ തുടർന്ന് ആഭ്യന്തര മന്ത്രി അമിത് ഷാ പശ്ചിമബംഗാൾ മുഖ്യമന്ത്രി സുവേന്ദു അധികാരിയുമായി ഫോണിൽ സംസാരിച്ചു.
പരിക്കേറ്റവർക്ക് മികച്ച ചികിത്സാ സൗകര്യങ്ങൾ ഉറപ്പാക്കിയിട്ടുണ്ടെന്ന് അദ്ദേഹം വ്യക്തമാക്കി. സ്ഥിതിഗതികൾ വിലയിരുത്തുന്നതിന്റെ ഭാഗമായി നാളെ പശ്ചിമബംഗാളിൽ പങ്കെടുക്കാൻ നിശ്ചയിച്ചിരുന്ന ഔദ്യോഗിക പരിപാടികൾ അമിത് ഷാ റദ്ദാക്കിയിട്ടുണ്ട്.
കൂടാതെ പരിക്കേറ്റവരെ കാണാൻ ആശുപത്രിയും സന്ദർശിക്കും. വടക്കൻ കൊൽക്കത്തയിലെ ചോർ ഭാഗാനിലെ ദുർഗാ പൂജ പന്തലിലാണ് ദുരന്തമുണ്ടായത്. ശനിയാഴ്ച വൈകുന്നേരം ഏഴ് മണിയോടെ പ്രദേശത്ത് കനത്ത മഴയും മിന്നലും ഉണ്ടായതിനെത്തുടർന്ന് പൂജ കാണാനെത്തിയവർ ഒന്നിച്ച് പന്തലിനുള്ളിലേക്ക് അഭയം തേടാൻ ശ്രമിച്ചപ്പോഴാണ് തിക്കിലും തിരക്കുമുണ്ടായത്.
പരിക്കേറ്റ ചിലരുടെ നില അതീവ ഗുരുതരമായി തുടരുകയാണ്. സംഭവസ്ഥലത്ത് ദുരന്തനിവാരണ സേന എത്തി രക്ഷാപ്രവർത്തനം ഏകോപിപ്പിച്ചു വരികയാണ്.
