തിരുവനന്തപുരം: വോട്ടർപട്ടികയിലെ പ്രത്യേക തീവ്ര പുനഃപരിശോധന കേരളത്തിലെ തിരഞ്ഞെടുപ്പ് ഫലത്തെ സ്വാധീനിച്ചെന്ന വിഷയത്തിൽ സിപിഎം നേതാക്കൾക്കിടയിൽ ഭിന്നത. എസ്‌ഐആർ ക്രമക്കേടുകളാണ് കേരളത്തിൽ എൽഡിഎഫ് തിരിച്ചടിക്ക് കാരണമെന്ന് പറയാനാവില്ലെന്ന് സിപിഎം കേന്ദ്ര കമ്മിറ്റി അംഗം കെ.കെ. ശൈലജ വ്യക്തമാക്കിയപ്പോൾ, തെരഞ്ഞെടുപ്പ് ഫലത്തെ വോട്ടർപട്ടിക പരിഷ്കരണം സ്വാധീനിച്ചിട്ടുണ്ടെന്ന നിലപാടാണ് മുതിർന്ന നേതാവ് കെ.എൻ. ബാലഗോപാൽ സ്വീകരിച്ചത്.
കേരളത്തിലും തമിഴ്നാട്ടിലും ഉണ്ടായ ഭരണമാറ്റത്തിന് കാരണം എസ്‌ഐആർ ആണെന്ന കോക്രോച്ച് ജനതാ പാർട്ടി (സിജെപി) സ്ഥാപകൻ അഭിജീത് ദീപ്കെയുടെ പരാമർശത്തോട് പ്രതികരിക്കുകയായിരുന്നു ഇരു നേതാക്കളും.വോട്ടർപട്ടിക പരിഷ്കരണം തോൽവിക്ക് വഴിവെച്ച പല കാരണങ്ങളിൽ ഒന്നു മാത്രമാകാമെന്ന് കെ.കെ. ശൈലജ പറഞ്ഞു. ഇടതുപക്ഷ വോട്ടുകൾ വെട്ടിമാറ്റാൻ കോൺഗ്രസ് ശ്രമിക്കുകയും അനധികൃതമായി വോട്ട് ചേർക്കാൻ എസ്‌ഐആറിനെ യുഡിഎഫ് ദുരുപയോഗം ചെയ്യുകയും ചെയ്തിട്ടുണ്ട്.
എന്നാൽ അന്നത്തെ എൽഡിഎഫ് സർക്കാരിന്റെ ജാഗ്രത കാരണം വലിയ അട്ടിമറി നടന്നിട്ടില്ലെന്നും അവർ കൂട്ടിച്ചേർത്തു. എന്നാൽ, കഴിഞ്ഞ നിയമസഭാ തെരഞ്ഞെടുപ്പ് ഫലത്തെ വോട്ടർപട്ടിക പരിഷ്കരണം കാര്യമായി സ്വാധീനിച്ചുവെന്നും ഇത് സാധൂകരിക്കുന്ന പഠന റിപ്പോർട്ടുകളുണ്ടെന്നും കെ.എൻ. ബാലഗോപാൽ വാദിച്ചു. ഇതിന്റെ ആനുകൂല്യം യുഡിഎഫിനും ബിജെപിക്കും ലഭിച്ചുവെന്നും വരാനിരിക്കുന്ന ലോക്സഭാ തെരഞ്ഞെടുപ്പിലും ബിജെപിക്ക് ഇത് തുണയാകുമെന്നും അദ്ദേഹം ആരോപിച്ചു. അതേസമയം, ആരോപണങ്ങളെല്ലാം പൂർണ്ണമായി തള്ളി കോൺഗ്രസ് രംഗത്തെത്തി.
ഇടതുപക്ഷ സർക്കാരിന്റെ പരാജയത്തിന് കാരണം ശക്തമായ ഭരണവിരുദ്ധ വികാരമാണെന്നും തിരഞ്ഞെടുപ്പ് ഫലത്തെ എസ്‌ഐആറുമായി ബന്ധിപ്പിക്കുന്നത് യഥാർഥ പ്രശ്നങ്ങളിൽ നിന്ന് ശ്രദ്ധതിരിക്കാനാണെന്നും കോൺഗ്രസ് പ്രതികരിച്ചു. സിജെപിയുടെ പരാമർശങ്ങൾ ബിജെപിയെ രാഷ്ട്രീയമായി സഹായിക്കുന്നതാണെന്നും കോൺഗ്രസ് ആരോപിച്ചു.
