മലപ്പുറം : നിലമ്പൂരിൽ ഓടിക്കൊണ്ടിരുന്ന ബൈക്കിന് പെട്ടെന്ന് തീപിടിച്ച് അപകടം. ഇന്ന് ഉച്ചയോടെയാണ് സംഭവം. ബൈക്ക് യാത്രികൻ സമയോചിതമായി വാഹനം നിർത്തി ഇറങ്ങിമാറിയതിനാൽ വന്‍ ദുരന്തം ഒഴിവായി. യാത്രയ്ക്കിടെ ബൈക്കിന്റെ എഞ്ചിൻ ഭാഗത്തുനിന്നും ആദ്യം പുകയും പിന്നീട് തീയും ഉയരുകയായിരുന്നു.
ഇത് ശ്രദ്ധയിൽപ്പെട്ട ഉടൻ തന്നെ യാത്രികൻ വാഹനം റോഡരികിലേക്ക് മാറ്റിനിർത്തി പുറത്തിറങ്ങി. പിന്നാലെ തീ അതിശക്തമായി പടരുകയും നിമിഷങ്ങൾക്കകം ബൈക്ക് അഗ്നിക്കിരയാവുകയും ചെയ്തു. അപകടത്തിൽ ബൈക്ക് യാത്രികന് പരിക്കുകളൊന്നും സംഭവിച്ചിട്ടില്ല. എന്നാൽ തീപിടുത്തത്തിൽ വാഹനം പൂർണ്ണമായും നശിച്ചു. തീപിടുത്തത്തിന്റെ കാരണം ഇതുവരെ വ്യക്തമായിട്ടില്ല.
വാഹനത്തിലെ സാങ്കേതിക തകരാറാണോ അതോ മറ്റ് കാരണങ്ങളാണോ എന്ന് പോലീസ് പരിശോധിച്ച് വരികയാണ്. സംഭവത്തെ തുടർന്ന് പ്രദേശത്ത് കുറച്ചുനേരം പരിഭ്രാന്തി പരന്നു. യാത്രയ്ക്കിടെ വാഹനത്തിൽ നിന്ന് അസാധാരണമായ പുകയോ മണമോ ശ്രദ്ധയിൽപ്പെട്ടാൽ ഉടൻ വാഹനം നിർത്തി സുരക്ഷിതമായ അകലത്തിലേക്ക് മാറണമെന്ന് അധികൃതർ മുന്നറിയിപ്പ് നൽകി.
