മലപ്പുറം: നിലമ്പൂർ വനമേഖലയിലെ മുത്തപ്പൻകുന്ന് ഭാഗത്തുനിന്നും വലിയ തോതിൽ വിലപിടിപ്പുള്ള വനവൃക്ഷങ്ങൾ വെട്ടിക്കടത്തിയതായി കണ്ടെത്തി. കാഞ്ഞിരപ്പുഴ ഫോറസ്റ്റ് സ്റ്റേഷൻ പരിധിയിൽപ്പെടുന്ന ഏകദേശം 7.5 ഹെക്ടറോളം വരുന്ന വനഭൂമിയിൽ നിന്നാണ് മരങ്ങൾ അപഹരിക്കപ്പെട്ടത്.തേക്ക്, ഈട്ടി, ഇരുൾ തുടങ്ങിയ ഇരുപതോളം വിലപിടിപ്പുള്ള വൻമരങ്ങളാണ് സംഘം വെട്ടിക്കടത്തിയത്.രണ്ടാഴ്ച മുൻപാണ് മരങ്ങൾ വെട്ടിമാറ്റി ട്രാക്ടറുകളിൽ കയറ്റി കടത്തിക്കൊണ്ടുപോയതെന്ന് വനംവകുപ്പ് വ്യക്തമാക്കുന്നു.
1980-കളിൽ സ്വകാര്യ വ്യക്തികൾ കൈയേറിയിരുന്ന വനഭൂമിയാണിത്.സംഭവത്തിൽ വനംവകുപ്പ് കേസെടുത്ത് അന്വേഷണം ആരംഭിച്ചു. മരങ്ങൾ വെട്ടിക്കടത്തിയ സംഘത്തെക്കുറിച്ചും മരം കടത്താൻ ഉപയോഗിച്ച ട്രാക്ടറുകളെക്കുറിച്ചും കൃത്യമായ സൂചനകൾ ലഭിച്ചിട്ടുണ്ടെന്ന് വനംവകുപ്പ് ഉദ്യോഗസ്ഥർ അറിയിച്ചു. പ്രതികളെ ഉടൻ തന്നെ പിടികൂടാനുള്ള നടപടികൾ വനംവകുപ്പ് വേഗത്തിലാക്കിയിട്ടുണ്ട്.
