കൊല്ലം: കടയ്ക്കലിൽ ഏഴ് വയസ്സുകാരിയെ നിരന്തരം ലൈംഗിക പീഡനത്തിനിരയാക്കിയ സംഭവത്തിൽ രണ്ട് യുവാക്കൾക്കെതിരെ പോക്സോ (POCSO) കേസ് രജിസ്റ്റർ ചെയ്തു. പ്രതികളിൽ ഒരാളായ കടയ്ക്കൽ കോവൂർ സ്വദേശി സച്ചു (21) എന്ന യുവാവിനെ കടയ്ക്കൽ പോലീസ് അറസ്റ്റ് ചെയ്തു. ഒളിവിലുള്ള രണ്ടാമത്തെ പ്രതിക്കായി പോലീസ് തിരച്ചിൽ ഊർജ്ജിതമാക്കിയിട്ടുണ്ട്.കുട്ടിയ്ക്ക് മിഠായിയും മറ്റും നൽകി പ്രലോഭിപ്പിച്ച് പ്രതിയുടെ വീട്ടിലെത്തിച്ചായിരുന്നു പീഡനം.
കഴിഞ്ഞ ഒരു വർഷത്തോളമായി കുട്ടി ഈ ക്രൂരതയ്ക്ക് ഇരയാവുകയായിരുന്നു.പ്രതി കുട്ടിയെ ഉപദ്രവിക്കുന്നത് നേരിൽ കണ്ട ഒരു ബന്ധുവാണ് ചൈൽഡ് ലൈനിൽ വിവരമറിയിച്ചത്. തുടർന്ന് ചൈൽഡ് ലൈൻ നൽകിയ നിർദ്ദേശപ്രകാരം പോലീസ് അടിയന്തര നടപടി സ്വീകരിക്കുകയായിരുന്നു.കുട്ടിയുടെ മൊഴി രേഖപ്പെടുത്തിയ ശേഷം വിശദമായ അന്വേഷണമാണ് പോലീസ് നടത്തുന്നത്. കേസിൽ ഉൾപ്പെട്ട രണ്ടാമത്തെ പ്രതിയെ ഉടൻ തന്നെ നിയമത്തിന് മുന്നിൽ കൊണ്ടുവരുമെന്ന് കടയ്ക്കൽ പോലീസ് അറിയിച്ചു.
