കോട്ടയം: കോട്ടയം കൂട്ടിക്കലിൽ ലഹരിക്ക് അടിമയായ യുവാവ് വീടിനുള്ളിൽ ഗ്യാസ് സിലിണ്ടർ തുറന്നുവിട്ട് ഭീകരാന്തരീക്ഷം സൃഷ്ടിച്ചു. നാട്ടുകാരെയും പൊലീസിനെയും മണിക്കൂറുകളോളം മുൾമുനയിൽ നിർത്തിയ കൂട്ടിക്കൽ സ്വദേശി ഇബ്രാഹിമിനെ ഒടുവിൽ പൊലീസും ഫയർഫോഴ്സും ചേർന്ന് സാഹസികമായി പിടികൂടി. എന്നാൽ സ്റ്റേഷനിലേക്ക് കൊണ്ടുപോകും വഴി പൊലീസ് വാഹനത്തിൽ നിന്ന് ചാടി രക്ഷപ്പെടാനും ഇയാൾ ശ്രമിച്ചു.
ഇന്ന് രാവിലെയായിരുന്നു നാടകീയമായ സംഭവങ്ങൾ അരങ്ങേറിയത്.
കുടുംബം വീടുവിട്ടിറങ്ങി രാവിലെ മുതൽ അതിക്രമം കാണിച്ച ഇബ്രാഹിം വീട്ടിൽ കടുത്ത ബഹളം വെക്കാൻ തുടങ്ങി. ഇതോടെ ഭയന്നുപോയ അമ്മയും സഹോദരിയും ജീവൻ രക്ഷിക്കാനായി വീട്ടിൽ നിന്നും ഇറങ്ങിയോടി.ഭീതി പടർത്തി ഗ്യാസ് സിലിണ്ടർ തുറന്നുവിട്ടു: ബന്ധുക്കൾ മാറിയതോടെ ഇബ്രാഹിം വീടിനുള്ളിലെ എൽ.പി.ജി സിലിണ്ടർ തുറന്നുവിടുകയായിരുന്നു.
പ്രദേശമാകെ പാചകവാതകത്തിന്റെ ഗന്ധം പടർന്നതോടെ പരിഭ്രാന്തരായ നാട്ടുകാർ ഉടൻ തന്നെ പൊലീസിനെയും ഫയർഫോഴ്സിനെയും വിവരമറിയിച്ചു.സാഹസികമായി കീഴടക്കി സ്ഥലത്തെത്തിയ ഫയർഫോഴ്സും പൊലീസും ഏറെ പ്രയത്നിച്ചാണ് സിലിണ്ടർ സുരക്ഷിതമായി അടയ്ക്കുകയും ഇബ്രാഹിമിനെ കീഴ്പ്പെടുത്തുകയും ചെയ്തത്.പ്രതിയെ കസ്റ്റഡിയിലെടുത്ത് പൊലീസ് സ്റ്റേഷനിലേക്ക് കൊണ്ടുപോകുന്നതിനിടയിലും ഇയാൾ പരാക്രമം തുടർന്നു. ഓടിക്കൊണ്ടിരുന്ന പൊലീസ് ജീപ്പിൽ നിന്ന് ഇയാൾ പുറത്തേക്ക് ചാടുകയായിരുന്നു.
വീഴ്ചയിൽ പരിക്കേറ്റ ഇബ്രാഹിമിനെ നിലവിൽ ആശുപത്രിയിൽ പ്രവേശിപ്പിച്ചിരിക്കുകയാണ്.ഇയാൾ സ്ഥിരമായി ലഹരി ഉപയോഗിക്കാറുണ്ടെന്നും ലഹരിയുടെ പുറത്ത് ഇത്തരത്തിൽ പല വിഭ്രാന്തികളും അക്രമസ്വഭാവവും കാണിക്കാറുണ്ടെന്നും പൊലീസ് സ്ഥിരീകരിച്ചു. കഴിഞ്ഞ കുറച്ചുകാലമായി ഇയാളുടെ ശല്യം കാരണം പ്രദേശവാസികൾ ബുദ്ധിമുട്ടിലായിരുന്നുവെന്നും നാട്ടുകാർ പറയുന്നു.
