പത്തനംതിട്ട : മലയാള സിനിമാ മേഖലയിലുണ്ടായ പ്രശ്നങ്ങളിൽ മുതിർന്ന താരങ്ങൾ മാറിനിൽക്കാതെ അടിയന്തരമായി ഇടപെടണമെന്ന് സാംസ്കാരിക വകുപ്പ് മന്ത്രി പി സി വിഷ്ണുനാഥ്. സിനിമ വ്യവസായത്തിലല്ല, മറിച്ച് താര സംഘടനയ്ക്കുള്ളിലാണ് നിലവിൽ ഏറെ പ്രശ്നങ്ങളുള്ളതെന്നും അവ പരിഹരിക്കാൻ മുതിർന്ന വ്യക്തിത്വങ്ങൾ മുൻകൈ എടുക്കേണ്ട സമയം അതിക്രമിച്ചിരിക്കുന്നുവെന്നും മന്ത്രി ആവശ്യപ്പെട്ടു.
സിനിമാ മേഖലയിലെ ബന്ധപ്പെട്ട എല്ലാവരുടെയും അടിയന്തര യോഗം നാളെ വൈകുന്നേരം വിളിച്ചിട്ടുണ്ടെന്നും മന്ത്രി മാധ്യമങ്ങളോട് അറിയിച്ചു. താര സംഘടനയിലെ പ്രശ്നങ്ങൾ ഇപ്പോൾ ആശാസ്യമായ രീതിയിലല്ല മുന്നോട്ട് പോകുന്നത്. പ്രശ്നങ്ങൾ കൈവിട്ട് മറ്റൊരു തലത്തിലേക്ക് പോകാതിരിക്കാൻ മുതിർന്ന താരങ്ങൾ എത്രയും വേഗം ഇടപെടണം.
ഒരു മന്ത്രി എന്ന നിലയിലല്ല, സിനിമയെ സ്നേഹിക്കുന്ന ഒരു സാധാരണ പ്രേക്ഷകൻ എന്ന നിലയിലാണ് താൻ ഇത് ആവശ്യപ്പെടുന്നത്. സിനിമാ മേഖലയിൽ നിന്ന് ആവശ്യപ്പെടുന്ന കാര്യങ്ങളിലാണ് സർക്കാർ സാധാരണ ഇടപെടാറുള്ളത്. നിലവിൽ സർക്കാരിന് മുന്നിൽ ഔദ്യോഗികമായി ആരും പരാതികൾ ഒന്നും നൽകിയിട്ടില്ല.
പരാതി ലഭിച്ചില്ലെങ്കിൽ പോലും സർക്കാർ ഇടപെടേണ്ട ഘട്ടത്തിൽ ശക്തമായിത്തന്നെ ഇടപെടുമെന്ന് മന്ത്രി വ്യക്തമാക്കി. ഹേമ കമ്മിറ്റി റിപ്പോർട്ട് താൻ ഇതുവരെ കണ്ടിട്ടില്ല. എങ്കിലും സംസ്ഥാനത്ത് നിലവിലുള്ള സിനിമാ നയം മാത്രം മതിയോ അതോ അതിൽ കൂടുതൽ മാറ്റങ്ങൾ വരുത്തേണ്ടതുണ്ടോ എന്നത് കൃത്യമായി പരിശോധിക്കപ്പെടേണ്ടതുണ്ടെന്നും മന്ത്രി കൂട്ടിച്ചേർത്തു.
