തിരുവനന്തപുരം: സംസ്ഥാനത്ത് പുതിയതായി അധികാരമേറ്റ വി.ഡി. സതീശന്റെ നേതൃത്വത്തിലുള്ള യുഡിഎഫ് സർക്കാർ, മുൻ എൽ.ഡി.എഫ് സർക്കാരിന്റെ വിവാദ ‘സിൽവർ ലൈൻ’ പദ്ധതിക്ക് പകരം പുതിയ അതിവേഗ റെയിൽപാത നടപ്പിലാക്കാനൊരുങ്ങുന്നു. കേരളത്തിന്റെ തെക്കേയറ്റം മുതൽ വടക്കേയറ്റം വരെ ബന്ധിപ്പിക്കുന്ന ഒരു ബദൽ അതിവേഗ റെയിൽ പദ്ധതിയാണ് പുതിയ സർക്കാരിന്റെ ലക്ഷ്യം.
പദ്ധതിയുടെ പ്രാരംഭ ചർച്ചകൾക്കായി മുഖ്യമന്ത്രി വി.ഡി. സതീശൻ ഇന്ന് ‘മെട്രോമാൻ’ ഇ. ശ്രീധരനുമായി കൂടിക്കാഴ്ച നടത്തും. തിരുവനന്തപുരത്ത് വെച്ച് വൈകുന്നേരമാണ് ഈ സുപ്രധാന കൂടിക്കാഴ്ച നിശ്ചയിച്ചിരിക്കുന്നത്. മുൻപ് സിൽവർ ലൈനിന് ബദലായി ഇ. ശ്രീധരൻ മുന്നോട്ടുവെച്ച റെയിൽവേ പദ്ധതിയെക്കുറിച്ചും അതിന്റെ പ്രായോഗികതയെക്കുറിച്ചും യോഗത്തിൽ വിശദമായ ചർച്ചകൾ നടക്കുമെന്നാണ് വിവരം.
