തിരുവനന്തപുരം:വാമനപുരം നദിയിൽ വീണ സുഹൃത്തിനെ രക്ഷിക്കാനുള്ള ശ്രമത്തിനിടെ ടെക്നോപാർക്ക് ജീവനക്കാരി മുങ്ങിമരിച്ചു. തിരുവനന്തപുരം കമലേശ്വരം സ്വദേശിനി അനുപമയാണ് (30) അപകടത്തിൽ മരണപ്പെട്ടത്.വ്യാഴാഴ്ചയായിരുന്നു നാടിനെ നടുക്കിയ ദാരുണമായ സംഭവം നടന്നത്.
അനുപമയും സുഹൃത്തുക്കളും അടങ്ങുന്ന സംഘം നദീതീരം സന്ദർശിക്കുന്നതിനിടെയാണ് അപകടമുണ്ടായത്.സംഘത്തിലെ ഒരു സുഹൃത്ത് അബദ്ധത്തിൽ നദിയിലെ ശക്തമായ ഒഴുക്കിൽപ്പെടുകയായിരുന്നു. ഇത് കണ്ട് സുഹൃത്തിനെ രക്ഷിക്കാൻ അനുപമ മുന്നോട്ട് ആഞ്ഞു ശ്രമിക്കുന്നതിനിടെ നദിയിലേക്ക് വീഴുകയായിരുന്നു. ഒഴുക്കിൽപ്പെട്ട സുഹൃത്തിനെ കൂടെയുണ്ടായിരുന്ന മറ്റുള്ളവർ ഉടൻ തന്നെ സുരക്ഷിതമായി കരയ്ക്ക് കയറ്റി.
തുടർന്ന് വെള്ളത്തിൽത്താണുപോയ അനുപമയെ പരിസരവാസികളും സുഹൃത്തുക്കളും ചേർന്ന് എത്രയും വേഗം കരയ്ക്കെത്തിച്ച് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. മൃതദേഹം നിലവിൽ പോസ്റ്റ്മോർട്ടം നടപടികൾക്കായി ആശുപത്രി മോർച്ചറിയിലേക്ക് മാറ്റിയിരിക്കുകയാണ്.
