പാലക്കാട് : അട്ടപ്പാടി കരുവാര ഊരിലെ പാതി പണി കഴിഞ്ഞ വീട് ഇടിഞ്ഞ് സഹോദരങ്ങൾക്ക് ദാരുണാന്ത്യം. ആദി (7), അജ്നേഷ് (4) എന്നിവരാണ് മരിച്ചത്. അജയ്-ദേവി ദമ്പതികളുടെ മക്കളാണ്. ബന്ധുവായ അഭിനയ(6) എന്ന കുട്ടിക്ക് ഗുരുതരമായി പരിക്കേറ്റിട്ടുണ്ട്. അഭിനയ നിലവില്‍ ചികിത്സയിലാണ്.
മുക്കാലിയിൽ നിന്ന് നാല് കിലോമീറ്റർ വനത്തിനുള്ളിലുള്ള കരുവാര ഊരിലാണ് അപകടം നടന്നത്. അപകടം നടന്ന വീടിന്റെ തൊട്ടടുത്താണ് കുട്ടികളുടെ വീട്. 8 വർഷമായി വീട് ഉപയോഗ ശൂന്യമായി കിടക്കുകയായിരുന്നു. മേൽക്കൂരയില്ലാത്ത വീടാണ്. മഴനനഞ്ഞും വെയിൽ കൊണ്ടും ദുർബലമായ അവസ്ഥയിലായിരുന്നു.
സ്കൂൾ അവധിയായതിനാൽ കുട്ടികൾ ഈ വീടിന്റെ സൺഷേഡിൽ കയറി കളിക്കുകയായിരുന്നു. ഈ സമയത്താണ് വീടിന്റെ ഭാഗം ഇടിഞ്ഞുവീണ് അപകടം സംഭവിച്ചത്. അപകടത്തിൽപ്പെട്ട കുട്ടികളെ വനം വകുപ്പിന്റെ ജീപ്പിലാണ് ഉടൻ ആശുപത്രിയിൽ എത്തിച്ചത്. കുട്ടികളുടെ മൃതദേഹങ്ങൾ കോട്ടത്തറ ആശുപത്രി മോര്‍ച്ചറിയിലാണ്.
