റിയാദ് : തീർത്ഥാടകർക്ക് നൽകുന്ന സേവനങ്ങളുടെ നിലവാരം ഉയർത്തുക എന്ന ലക്ഷ്യത്തോടെയുള്ള അന്താരാഷ്ട്ര ഹജ്ജ് സമ്മേളനത്തിനും എക്സ്പോയ്ക്കും ജിദ്ദയിൽ നാളെ തുടക്കമാകും. സൗദി ഭരണാധികാരി സൽമാൻ രാജാവിന്റെ രക്ഷാകർതൃത്വത്തിൽ ഹജ്ജ്, ഉംറ മന്ത്രാലയമാണ് സൂപ്പർഡോമിൽ നടക്കുന്ന പരിപാടിയുടെ സംഘാടകർ.
സമ്മേളനം ബുധനാഴ്ച വരെ നീണ്ടുനിൽക്കും. തീർഥാടകർക്ക് നൽകുന്ന സേവനങ്ങളുടെ ഗുണനിലവാരം വികസിപ്പിക്കുന്നതിനായി സാങ്കേതികവിദ്യ, നഗരവികസനം, മാനവ വിഭവശേഷി എന്നിവ സമന്വയിപ്പിച്ചുകൊണ്ട് പുതിയ പദ്ധതികൾക്ക് തുടക്കം കുറിക്കാനും തന്ത്രപരമായ കരാറുകൾ ഒപ്പിടാനും സമ്മേളനം ലക്ഷ്യമിടുന്നു.
ഡിജിറ്റൽ പരിവർത്തനം, സ്മാർട്ട് മാനേജ്മെന്റ് പരിഹാരങ്ങൾ എന്നിവയിലൂന്നിയുള്ള ചർച്ചകളാണ് ഇത്തവണ നടക്കുക. ഹജ്ജ് സംവിധാനത്തിലെ ഏറ്റവും പുതിയ കണ്ടുപിടിത്തങ്ങൾ വിലയിരുത്തുന്നതിനും പൊതു-സ്വകാര്യ-ലാഭേച്ഛയില്ലാത്ത മേഖലകൾക്കിടയിൽ പങ്കാളിത്തം കെട്ടിപ്പടുക്കുന്നതിനുമുള്ള ഒരു ആഗോള വേദിയാണിത്.
വിദഗ്ധർ, സ്പെഷ്യലിസ്റ്റുകൾ, വിവിധ രാജ്യങ്ങളുടെയും സംഘടനകളുടെയും പ്രതിനിധികൾ എന്നിവർ പങ്കെടുക്കും. 80ലധികം സംവാദ സെഷനുകളും 60 പ്രത്യേക വർക്ക്ഷോപ്പുകളും നടക്കും. 52,000 ചതുരശ്ര മീറ്ററിലധികം വിസ്തീർണമുള്ള പ്രദർശന വേദിയിൽ 13 മേഖലകളിൽ നിന്നുള്ള 260ലധികം സ്ഥാപനങ്ങൾ അണിനിരക്കും. അക്കാദമിക് വിദഗ്ധരും ഗവേഷകരും ഉൾപ്പെടെ 95-ലധികം പ്രഭാഷകരും, ലോകമെമ്പാടുമുള്ള 2,400-ലധികം പരിശീലകർക്കും ഈ പരിപാടി പ്രയോജനപ്പെടും.
ആർട്ടിഫിഷ്യൽ ഇന്റലിജൻസ് ഉപയോഗിച്ചുള്ള ഈഷാത്തോൺ, പുണ്യസ്ഥലങ്ങളിലെ സൗകര്യങ്ങൾ വർദ്ധിപ്പിക്കുന്ന വിശുദ്ധ സ്ഥലങ്ങളെ മാനുഷികമാക്കൽ തുടങ്ങിയ നൂതന സംരംഭങ്ങളും കോൺഫറൻസിൽ അവതരിപ്പിക്കും. ഈ വർഷത്തെ പരിപാടിയിൽ ഒന്നര ലക്ഷം സന്ദർശകരെയാണ് പ്രതീക്ഷിക്കുന്നത്.
