പാലക്കാട് : യാത്രക്കാരുടെ ദീർഘകാല ആവശ്യമായിരുന്ന പാലക്കാട്-ഗൂഡല്ലൂർ റൂട്ടിലെ ആദ്യത്തെ കെഎസ്ആർടിസി സർവീസ് ആരംഭിച്ചു. രാഹുൽ മാങ്കൂട്ടത്തിൽ എംഎൽഎ സർവീസ് ഫ്ലാഗ് ഓഫ് ചെയ്തു. പാലക്കാട് ഡിപ്പോയിൽനിന്ന് മണ്ണാർക്കാട്, വഴിക്കടവ്, നിലമ്പൂർ വഴിയാണ് ബസ് ഗൂഡല്ലൂരിലേക്ക് എത്തുന്നത്. ദിവസവും രാവിലെ 7.45ന് ഡിപ്പോയിൽ നിന്ന് പുറപ്പെട്ട് ഉച്ചയ്ക്ക് 12.20ന് ഗൂഡല്ലൂരിൽ എത്തും.
തിരിച്ച് ഉച്ചയ്ക്ക് 1.30ന് പുറപ്പെട്ട് വൈകിട്ട് 6.05ന് പാലക്കാട് ഡിപ്പോയിൽ എത്തും. യാത്രക്കാരുടെ തുടർച്ചയായ ആവശ്യം പരിഗണിച്ച് ഗതാഗത മന്ത്രിയെ നേരിൽ കണ്ടതിനെ തുടർന്നാണ് സർവീസിന് അനുമതി ലഭിച്ചതെന്ന് രാഹുൽ മാങ്കൂട്ടത്തിൽ എംഎൽഎ പറഞ്ഞു. വരും ദിവസങ്ങളിൽ കൂടുതൽ പുതിയ സംസ്ഥാനാന്തര സർവീസുകൾ ആരംഭിക്കുമെന്നും അദ്ദേഹം കൂട്ടിച്ചേർത്തു. ജില്ലാ ട്രാൻസ്പോർട്ട് ഓഫീസർ ജോഷി ജോൺ, യൂണിയൻ ഭാരവാഹികളായ സന്തോഷ് കുമാർ, രവി കണ്ണാടി എന്നിവരും ചടങ്ങിൽ പങ്കെടുത്തു.
